मिर्चैयाका मेयर यादवद्वारा क्वारेन्टाइन अनुगमन, कर्मचारीलाई यस्तो निर्देशन

न्यूज ब्यूरो, सिरहा । मिर्चैया नगरपालिकाका नगरप्रमुख श्रवण कुमार यादवले क्वारेन्टाइनको अनुगमन गरेका छन् ।

बैदेशिक रोजगारीबाट फर्केका तथा बाहिरबाट आई क्वारेन्टाइनमा बसेकाहरुले सामाजिक सञ्जालमार्फत् आफूहरुलाई क्वारेन्टाइनमा समस्या भएको गुनासो पोखेपछि मेयर यादवले शनिवार क्वारेन्टाइन अनुगमनमा पुगेका हुन् ।

नगरपालिकाद्वारा मिर्चैयास्थित दुई होटलमा सञ्चालित क्वारेन्टाइनको अगुमनमा पुगेका मेयर यादवले क्वारेन्टाइन स्थलको अवस्था, क्वारेन्टाइनमा बसेकाहरुको अवस्था तथा स्वास्थ्य स्थिति, खाना, नास्ता, खानेपानी, विधुत, लगायतका विषयमा जानकारी लिएका छन् ।

अगुमनका क्रममा क्वारेन्टाइनमा बसेकाहरुसँग सोधपुछ गरी जानकारी लिँदै उनले आएका गुनासाहरु तत्कालै सम्बोधन गर्न क्वारेन्टाइन सञ्चालनमा खटेका कर्मचारीहरुलाई निर्देशन दिए । ‘निरन्तरको व्यस्तताका कारण केहि त्रुटि हुनसक्ला,’ उनले भने, ‘तर हामी हाम्रा नागरिकलाई कुनै समस्या होस् भनेर चाँहदैनौं ।’

होटलमै क्वारेन्टाइन भएकाले अन्य ठाउँभन्दा यहाँ राम्रो सुविधा भएको भन्दै केहि समस्या भए कर्मचारीलाई जानकारी गराउन र समाधान नभए आफूलार्ई सम्पर्क गर्न उनले आग्रह गरे । ‘अधिकांश ठाउँमा स्कूलहरुमा क्वारेन्टाइन छ, राम्रो व्यवस्थापन छैन, बसेकाहरुको निगरानी छैन, तर हामीले नागरिकको सुविधाका लागि होटलमै क्वारेन्टाइन राखेका छौं,’ उनले भने, ‘खाना पनि क्वारेन्टाइनमा बसेका र क्वारेन्टाइन सञ्चालनमा खटेकाहरुलाई एउटै दिइराखेका छौं ।’

नगरपालिकाद्वारा सञ्चालित क्वारेन्टाइनमा बिहानको समयमा चिया, बिस्कुट त्यसपछि नास्ता, ११ बजे खाना, दिउँसो ४ बजेतिर फेरि नास्ता र राति ८ बजे खाना दिने गरिएको छ । हरेक शनिबार खानामा मासु दिने गरिएको छ भने सातामा एकदिन नास्तामा अण्डासहित दिने गरिएको छ ।

पहिलादेखि प्रतिव्यक्ति दिनमा ४ बोतल पानी दिने गरिएकोमा आजदेखि ५ बोतल पानी दिन मेयर यादवले कर्मचारीलाई निर्देशन दिए । होटलमा क्वारेन्टाइन भएकाले यहाँ वाईफाईको सुविधा पनि छ ।

हाल क्वारेन्टाइनमा जम्मा ४३ जना रहेको तथा हालसम्म ३ सय ८६ जनालाई क्रमशः पठाइसकिएको नगर स्वास्थ्य संयोजक सुरेश सिंहले जानकारी दिए । हालसम्म क्वारेन्टाइनमा बसेकाहरु सबैको रिपोर्ट निगेटिभ नै आएको उनले बताए ।

आइतबार (भोलि) पुनः मिर्चैयामा पीसीआर परीक्षण हुँदैछ । जसमा क्वारेन्टाइनमा बसेको ५ दिन वा सोभन्दा बढी भएका व्यक्ति तथा मिर्चैयामा भेटिएका तीनजना संक्रमितको सम्पर्कमा आएका व्यक्तिहरुको जाँच गरिने उनले बताए ।

यस्तै, महामारीका रुपमा फैलिएको कोरोना भाइरस (काभिड–१९) को संक्रमण रोकथाम तथा नियन्त्रण गर्न तथा जोखिम निम्तिन नदिन बाहिरबाट आएका व्यक्तिलाई क्वारेन्टाइनमा राख्ने गरेको बताउँदै मेयर यादवले अनिवार्य १४ दिनसम्म क्वारेन्टाइनमा बस्नसमेत आग्रह गरे ।

उनले सम्भावित जोखिमलाई मध्यनजर गर्दै एक हजार थान भिटिएम किट किन्ने तयारी गरेकोसमेत जानकारी दिएका छन् ।