आदिवासी जनजातीलाई राज्यको मूलधारमा ल्याउनैपर्छ : उपमेयर भूजेल

न्यूज ब्यूरो, जनकपुरधाम । धनुषाधाम नगरपालिकाकी उपमेयर विद्या देवी भूजेलले आदिवासी र जनजातीलाई राज्यको मूलधारमा ल्याउन सबै पक्षले उठनुपर्ने बताएकी छन् ।

धनुषाधाम नगरपालिकाको सहयोगमा सम्पन्न भएको आदिवासी जनजातीहरुको लागि क्षमता अभिवृद्धि तालिममा बोल्दै उपमेयर भूजेलले उनीहरु असली भूमिपुत्र भएपनि राज्यको मूलधारबाट बञ्चित भएको जिकीर गरिन् ।

उनले यीनीहरुलाई मूलधारमा नल्याए र सरकारको हरेक हत तप्कामा सहभागी नगराइए समावेशी विकासको परिकल्पना गर्न नसकिने बताइन् । उनीहरुलाई हरेक सेवा, सुविधा, अवसरहरुमा अधिकारको बढोत्तरी गरे मात्र उनीहरुलाई मूलधारमा ल्याउन कम समय लाग्ने बताइन् ।

समाजिक सँस्था उज्यालो नेपालको आयोजनामा आयोजन गरिएको उक्त क्षमता अभिवृद्धि तालिममा नगरभरिका आदिवासी जनजाती समुदायकी महिला पुरुषहरुको सहभागीता रहेको थियो ।

सो क्रममा उनीहरुले राज्यले आफूहरुसित अहिले पनि अधिकार कटौती गरेको अनुभव सुनाएका थिए । उज्यालो नेपालका अध्यक्ष सत्रुधन महतोको अध्यक्षतामा सम्पन्न भएको उक्त तालिममा सरकारसँग अधिकार माग्ने, समान व्यवहार, समान सम्मान, समावेशी अधिकार र राज्यको मूलधारमा आउनुपर्ने कारण तथा उपायबारे प्रकाश पारिएको थियो ।