मुसहर बस्तीमा 'स्टोरिज अफ नेपाल'को राहत

न्यूज ब्यूरो, सिरहा । सामाजिक क्षेत्रमा काम गर्दै आएको ‘स्टोरिज अफ नेपाल’ नामक संस्थाले सिरहामा राहत वितरण गरेको छ ।

लकडाउनका कारण समस्या खेपिरहेका मिर्चैया नगरपालिका–९ स्थित ढोढना मुसहर बस्तीका झण्डै ४० घर परिवारलाई संस्थाले राहत सामाग्री सहयोग गरेको हो ।

दैनिक ज्याला मजदुरी गरेर गुजारा गर्दै आएका उनीहरु बन्दाबन्दीमा काम नपाएर समस्या खेप्दै आएका छन् । लकडाउनका कारण समस्यामा परेका देशका विभिन्न स्थानका विपन्न वर्गलाई राहत सहयोग गर्दै आएको स्टोरिज अफ नेपालले यहाँ पनि राहत वितरण गरेको हो ।

यस्तै, लहान नगरपालिका–२४ मानिक दह र डाँडा टोलमा पनि ६० घर परिवारलाई राहत प्रदान गरिएको छ । राहत स्वरुप चामल, दाल, आलु, प्याज, खाने तेल, नुन, नुहाउने र लुगा धुने साबुन, बिस्कुट, मास्क, सेनिटरी प्याड वितरण गरेको राहत वितरणमा संलग्न संचारकर्मी विकास साहले बताए ।

राहत पाएपछि बस्तीका मुसहर परिवारहरु सहयोगी संस्थाप्रति आभार प्रकट गरे ।

लकडाउन अवधिमा स्थानीय जनप्रतिनिधि तथा प्रदेश सरकारले राहत बाँडिरहदा सरकारी राहत लिन छुटेका तथा दुई छाक टार्न संघर्ष गरिरहेका परिवारलाई ‘स्टोरिज अफ नेपाल’ले सहयोग गर्दै आएको छ ।