मिर्चैया नगरपालिका खुल्ला दिसामुक्त घोषणा

बिनय यादव, सिरहा, १२ माघ । सिरहाको मिर्चैया नगरपालिका खुल्ला दिसामुक्त नगरपालिका घोषित भएको छ । मिर्चैया नगरपालिकाका मेयर श्रवण कुमार यादवको अध्यक्षतामा आज (शुक्रबार) आयोजित समारोहका प्रमुख अतिथि एवम् जिल्ला समन्वय समितिका अध्यक्ष रामचन्द्र ठाकुरले मिर्चैया नगरपालिकालाई खुल्ला दिसामुक्त घोषणाको प्रमाणपत्र प्रदान गर्नुभएको हो ।

घोषणा समारोहमा बोल्दै प्रमुख अतिथि ठाकुरले सामाजिक समुन्नतिका लागि सामाजिक र मानवीय विकासलाई पहिलो प्राथमिकता दिनुपर्ने बताउनुभयो । उहाँले मिर्चैया नगरपालिकालाई सरसफाइ नमूना नगरपालिका बनाउने कार्यमा हामीले सदैव सक्दो सहयोग गर्ने प्रतिवद्धता समेत व्यक्त गर्नुभयो । मिर्चैया नगरपालिकाको सम्पुर्ण सरसफाइ कार्ययोजनालाई कार्यान्वयनमा ल्याउनका लागि सहयोग गर्न सम्पूर्ण साझेदारहरुलाई उहाँले आग्रह गर्नुभयो ।

कार्यक्रममा बोल्दै वक्ताहरूले पूर्ण सरसफाइ कार्ययोजना सार्वजनिक गरेर मिर्चैया नगरपालिकाले अन्य स्थानीय तहहरुलाई सरसफाइको पाठ सिकाएको बताउनुभयो । मिर्चैया नगरपालिकालाई पूर्ण सरसफाइयुक्त बनाउने कार्यमा आफूहरुको सहयोग निरन्तर रहने उहाँहरुले बताउनुभयो ।

समारोहको अवसरमा खुल्ला दिसामुक्त अभियानको कुशल व्यवस्थापन गरे वापत सो अभियानमा अहोरात्र खटेका अभियानीहरुलाई दोसल्ला ओढाएर सम्मान गरिएको थियो ।