सप्तरीमा मोटरसाइकल दुर्घटनामा एकको मृत्यु, एक घाइते

न्यूज ब्यूरो, सप्तरी । सप्तरीमा मोटरसाइकल दुर्घटनामा परेर एक जनाको ज्यान गएको छ ।

अग्निसाईर कृष्णासवरण गाउँपालिका–२ सितापुरस्थित पूर्व पश्चिम राजमार्गमा बिहीबार विहान भएको मोटरसाइकल दुर्घटनामा अग्निसाईर कृष्णसावरण ३ का ३६ वर्षीय तरुण सरदारको मृत्यु भएको हो ।

अर्का एक जना घाइते भएका छन् । मोटरसाइकलमा पछाडि बसेका ३५ वर्षीय विक्रम सरदार घाइते भएका हुन् । उनको टाउको तथा शरीरको विभिन्न भागमा चोट लागेको छ ।

पूर्वबाट पश्चिम तर्फ जाँदै गरेको ना ३ ख ६१२६ नम्बरको रोकी राखेको ट्रकमा सोही दिशातर्फ जाँदै गरेको स ८ प ५६२९ नम्बरको मोटरसाइकल आँफै अनियन्त्रित भएर ट्रकमा ठोक्किएको थियो । उनीहरु मदिरा सेवन गरेर अत्यधिक गतिमा मोटरसाइकल चलाएका कारण अनियन्त्रित भएर ट्रकमा ठोक्किएको बताइएको छ ।

दुर्घटनापछि घाइते दुबैलाई उपचारको लागि राजविराजस्थित गजेन्द्रनारायण सिंह अस्पताल लैजाँदै गर्दा चालक तरुणको बाटोमै मृत्यु भएको प्रहरीले जनाएको छ । विक्रमको भने विराटनगरस्थित न्यूरो हस्पिटलमा उपचार भइरहेको छ ।

दुर्घटनाको विषयमा थप अनुसन्धान कार्य भइरहेको जिल्ला प्रहरी कार्यालय सप्तरीका प्रहरी नायव उपरीक्षक (डिएसपी) तिलक भारतीले बताए ।