रौतहटमा विष सेवनबाट आमाछोरीको मृत्यु

न्यूज ब्यूरो, रौतहट । रौतहटमा घरायसी विवादका कारण छोराछोरीसँगै एक आमाले विष सेवन गरेकी छन् ।

विष सेवनबाट आमा र छोरीको मृत्यु भैइसकेको छ भने छोराको उपचार जारी रहेको छ । रौतहटको मौलापुर नगरपालिका १ का रामलाल महतो कोइरीको ३५ वर्षीया श्रीमती सोनावती महतोले मंगलबार बेलुकी १४ वर्षीय छोरा दिपक महतो र ७ वर्षीया छोरी सोनिकुमारीलाई बिष सेवन गराई आफू पनि सेवन गरेको रौतहट प्रहरीले जनाएको छ ।

बिष सेवनपछि अवस्था गम्भीर भएपछि तीनै जनालाई मौलापुरको एक निजिक्लिनिकमा सामान्य उपचार पछि थप उपचारका लागि एम्बुलेन्सबाट नेशनल मेडिकल कलेज बीरगंज पठाईएको थियो । सोनावतीको उपचारको क्रममा राति र छोरीको बुधबार बिहान मृत्यु भएको प्रहरीले जनाएको छ ।

छोरा दिपक महतोको उपचार भैइरहेको र अवस्थामा सुधार भइरहेको छ । प्रहरीले घटना सम्बन्धमा अनुसन्धान थालेको छ ।