कमला नगरपालिकाको ९ वटै वडा सेनिटाइज गरिदै

न्यूज ब्यूरो, जनकपुरधाम । पूर्वी धनुषाको कमला नगरपालिकालाई सेनिटाइजेशन सुरु गरिएको छ ।

कोरोना भाइरसको सँक्रमण रोकथाम गर्न आदेश र परिपत्र बमोजिम कमला नगरपालिकाको विभिन्न वडामा सेनिटाइज गर्ने कार्य सुरु गरिएको हो ।

कमला नगरपािलकाका निमित्त प्रमुख प्रशासकीय अधिकृत बीरेन्द्र सढानले नगरपालिकाको वडा नं. १ देखि वडा नं. ९ सम्मको सबै गाउँ, टोलहरुमा सेनिटाईज कार्य सुरु गरिएको बताउनुभयो ।

न्यूज ब्यूरोसँग कुराकानी गर्दै अधिकृत सढानले नगरको विभिन्न टोल र गल्लीहरुमा ब्लीचिँग पाउडर र क्लोरिन मिसाबटयुक्त पदार्थ गल्ली गल्लीको नालाहरुमा छर्किने कार्य सुरु गरेको बताउनुभयो ।

उहाँले नगरपालिकाको सबै वडासँग जोडिएर रहेको मेन रोड सहित घरधुरीको गल्ली गल्लीमा गएर नाला तथा पानी जम्ने स्थानमा सेनिटाइजेशन कार्यक्रम सुरु गरिएको थप्नुभयो ।

सेनिटाइजेशनको लागि ठुलो ड्रम सहित पियुठमा बोक्ने टयाँकी मार्फत गल्ली गल्लीमा औषधी छर्किने कार्य गरिएको नगरपालिकाका भेटेनेरी शाखा प्रमुख रबिन्द्र यादवले बताउनुभयो ।

यादवका अनुसार, प्रत्येक टोलहरुमा सेनिटाइजेशनको लागि कर्मचारी खटाइएको छ ।

उनीहरुलाई सुरक्षा कवच सहित सेनिटाइज कार्यमा लगाइएको बताउनुभयो ।

यसका साथै, कोरोना महामारीको प्रकोपलाई मध्यनजर गर्दै नगरपालिका भित्र विदेशबाट आएका नागरिकहरु उपर निगरानी गर्न महिला स्वयंसेविका खटाइने जनाइएको छ ।

प्रत्येक वडामा ६ ६ जना गरी नगरभरिमा ५४ जना महिला स्वयंम सेविका परिचालन गरिने जनाइएको छ ।

उनीहरुले विदेशबाट आएको तर लुकिछिपी घरमा बस्ने गरेकाहरुलाई नगरपालिकाको क्वारेन्टाइनमा राख्ने उदेश्यले परिचालन गरिएको बताउनुभयो ।

कमला नगरपालिकाले तयार पारेको १५ बेडको क्वारेन्टाइनमा ४ टाईम खाना सहित वाईफाई, पानी, सेनिटाईजर, मास्क, गम्छा समेतको व्यवस्था गरिएको अधिकृत सढानले बताउनुभयो ।