सिरहामा राहत वितरण विषयमा झडप, झण्डै कुटिए वडाध्यक्ष

न्यूज ब्यूरो, सिरहा । सिरहामा राहत वितरणको विषयमा झडप भएको छ ।

गोलबजार नगरपालिका १० मा राहत वितरणको सुरसार भइरहकै बेला झडप हुन पुगेको हो । वडा १० का वडाध्यक्ष देवनारायण महतोको संयोजकत्वमा रहेको सर्वदलिय सर्वपक्षिय समितिले निर्देशिका र मापदण्ड विपरीत राहत बाँड्न खोजेपछि विवाद भएको एक स्थानीयले बताए ।

राहत पाउनुपर्ने गरीब, दैनिक मजदूरी गर्ने मजदूरहरुले नपाई हुनेखाने सम्पन्न परिवारले समितिको अगुवा पछुवा गर्नेहरुले पाउन लाग्दा स्थानियहरुले रोक्न खोज्दा झडप भएको प्रत्यक्षदर्शीहरुले बताएका छन् । वडा अध्यक्ष महतोलाई समेत स्थानीयहरुले हातपात गर्न खोज्दा प्रहरीले सामान्य बल प्रयोग गरी झडपलाई सम्य पारेका थिए ।

राहत वितरणमा वडा अध्यक्षले नै लकडाउनलाई उल्लंघन गर्दै सामाजिक दुरीसमेत कायम नगरी राहत वितरण गर्न खोजेपछि विवाद भएको जनाइएको छ । झडपपछि राहत वितरण पनि स्थगित गरिएको छ ।