सबैलाका मेयर मोबाइल टोलीसहित सर्चमा, एकजना क्वारेन्टाइनमा राखिए

न्यूज ब्यूरो, धनुषा । धनुषाको सबैला नगरपालिकामा भारतबाट आएका एक व्यक्तिलाई क्वारेन्टाइनमा राखिएको छ ।

सबैला नगरपालिका १३ ढोलबजा मुसहरी टोलका सदा थर भएका एक व्यक्तिलाई सोमबार क्वारेन्टाइनमा भर्ना गरिएको हो । भारतबाट फर्केपछि उनी क्वारेन्टाइन नबसी छलेर बस्दै आएका थिए ।

भारतबाट हालसालै फर्केको जानकारी आएपछि नगरप्रमुख विजयशंकर प्रसाद साह आफै उनको घर पुगी क्वारेन्टाइनमा बस्न लगाएका हुन् । मेयर साहले पछि समस्या हुनसक्ने भन्दै सम्झाएपछि उनी क्वारेन्टाइन बस्न मानेका छन् ।

विश्वभर महामारीको रुपमा फैलिएको कोरोना भाइरस (कोभिड १९) फैलिन नदिन नगरप्रमुखको हैसियतले कम्मर कसेर लागेको मेयर साहले बताए । नगरपालिकाले सर्वसाधारणको सहजताको लागि मोबाइल टोलीको पनि व्यवस्था राखेको छ ।

कोरोना संक्रमण नेपालमा समेत भेटिएपछि निरन्तर रुपमा ग्राउण्ड जिरोमा खटिरहेको नगरप्रमुुख साहले बताए । उनले कसैलाई कुनै समस्या आए तत्कालै सम्पर्क गर्न आग्रह पनि गरेका छन् ।