प्रदेश २ : सार्वजनिक पदमा नभएकालाई मात्र राहत दिइने

न्यूज ब्यूरो, जनकपुरधाम । प्रदेश २ सरकारले घोषणा गरेको राहत राजनीतिक, प्रशासनिक र सार्वजनिक पदमा भएकाहरुले नपाउने भएका छन् ।

कोरोना भाइरस (कोभिड–१९) को संक्रमण रोक्न सरकारले गरेको लकडाउनबाट प्रभावित भएकाहरुलाई प्रदेश सरकारले दिने भनेको राहत वितरणमा नयाँ मापदण्ड बनेको हो । जस अनुसार वास्तविक समस्यामा परेका बाहेक अरुलाई राहत दिइने छैन ।

प्रदेश सरकारको निर्णय अनुसार परिवारका कुनै पनि सदस्यहरु राजनीतिक, प्रशासनिक र सार्वजनिक पदमा नरहेको अवस्थामा मात्रै राहत पाउने भएका छन् । प्रदेश सरकारको निर्देशिका अनुसार घरायसी र पारिवारिक कुनै पेशा व्यवसाय नभएको, दैनिक ज्याला मजदुरी गर्नेबाहेक अन्य कुनै आयश्रोत नभएका व्यक्तिहरुलाई मात्र राहत दिइनेछ ।