क्षीरेश्वरनाथमा गरिबलाई खाद्यान्न : 'कोरोनाविरुद्ध अलर्ट छौं'

न्यूज ब्यूरो, धनुषा । धनुषाको क्षीरेश्वरनाथ नगरपालिका लकडाउनबाट प्रभावित नगरभित्रका जनताको लागि अघि बढेको छ ।

नगरपालिकाले दैनिक ज्याला मजदुरी गरी हातमुख जोड्ने गरिब, विपन्न समुदायलाई खाद्यन्न वितरणसँगै हरेक नागरिकलाई मास्क र साबुन बाँड्ने कार्य सुरु गरेको हो । लकडाउनको अवधिमा प्रभावित बनेका मजदुर, गरिब तथा विपन्न परिवारलाई खाद्यान्न वितरण गरिएको नगरप्रमुख योगेन्द्र पजियारले जानकारी दिए ।

भीडभाड नगरी सामाजिक दुरी कायम गर्दै उक्त सामाग्रीहरु बाँडिएको मेयर पजियारले जनाए । नगरभित्रका सबै वडामा रहेका विपन्न समुदायलाई राहत स्वरुप पाँच केजी चामल, आधि केजी दाल, आधि केजी खाने तेल, १ केजी नुन, आधि केजी सोयाबिन, आधि केजी मुरही (भुजा), आधि केजी दालमोढ र एउटा डिटोल साबुन वितरण गर्ने काम भइरहेको उनले बताए ।

प्रत्येक वडाबाट संकलन गरिएको ज्याला मजदुरी गरी जिवन यापन गर्ने गरिब, विपन्न, दलित समुदायहरुको करिब २ हजार घरधुरीलाई राहत बाँडिरहेको मेयर पजियारले जनाए ।

क्षीरेश्वरनाथ नगरपालिकामा जम्मा ८ हजार ६ सय घरधुरी रहेको छ । नगरका सबै घरधुरीमा एउटा एउटा डिटोल साबुन वडाध्यक्ष मार्फत पुर्याउने योजना मेयर पजियारको छ ।

शंकास्पद व्यक्तिको लागि क्वारेन्टाइनको व्यवस्था पनि नगरपालिकाले गरेको छ । स्वास्थ्यमा कुनै समस्या देखिए तत्कालै नगरपालिकासँग सम्पर्क गर्न नागरिकलाई आग्रह पनि गरिएको छ ।

मेयर पजियारले कोरोनाविरुद्ध लड्न तयारी अवस्थामा रहेको बताए ।