रौतहटमा एक किशोरी बलात्कृत

न्यूज ब्यूरो, रौतहट । रौतहटमा लकडाउनको अवधिमै एक किशोरी बलात्कृत भएकी छन् ।

रौतहटको कटहरिया नगरपालिका ७ बगहीगाँउस्थित एक १७ वर्षीया किशोरीलाई २८ वर्षीय भाग्यनारायण साहलले बलात्कार गरेको आरोप लागेको छ । उनले दुईदिन अघिमात्र एकजना छिमेकीको छोरीलाई केही काम छ भनी आफ्नो घरमा बोलाएका थिए ।

घरका महिला र अन्य सदस्य खेतमा काम गर्न गएको मौका छोपी साहले दिउँसै ढोका थुनेर बलात्कार गरेका थिए । बलात्कार गरेको भिडिओ बनाएर घटनाबारे कसैलाई भनेमा भिडिओ सामाजिक संजालमा राखिदिने भन्दै साहले पटक पटक धम्की दिँदै आएका थिए ।

पीडितले घटनाबारे बाबु आमालाई बताएपछि घटना बाहिर आएको हो । बलात्कार गरेको घटनाबारे पीडितले आफ्ना बाबु आमालाई भने लगत्तै साह फरार भएका छन् । साहमाथि जबरजस्तीकरणी मुद्दा दर्ता भएको र भिडिओ बारे थप अनुसन्धान भइरहेको ईलाका प्रहरी कार्यालय गरुडाका प्रहरी नायव उपरीक्षक ज्ञानकुमार महतोले जानकारी दिए ।

पीडितको जिल्ला अस्पताल गौरमा स्वास्थ्य परिक्षण भइसकेको र आरोपी साहको खोजी भइरहेको प्रहरीले जनाएको छ ।