रौतहटमा पनि दादुरा रुबेला खोप अभियान फागुन १ देखि

न्यूज ब्यूरो, रौतहट । देशभरी दादुरा–रुबेला खोप अभियान सञ्चालन गर्ने कार्यक्रम अनुसार रौतहटमा पनि फाल्गुण १ गतेदेखी २३ गतेसम्म दादुरा रुबेला विरुद्धको खोप लगाउने अभियान सञ्चालन हुन लागेको छ ।

सरकारले प्रत्येक स्थानीयतमा खोप शिविर सञ्चालन गरेर ९ महिना देखि ५ वर्ष मुनिका बालबालिकाहरुलाई दादुरा–रुवेला विरुद्धको खोप लगाउने तयारी गरेको छ । त्यस्तै ५ वर्ष देखी ९ वर्षमुनीको बालबालिकालाई पोलियो थोपा खुवाईने छ ।

रौतहटको सदरमुकाम गौर स्थित जिल्ला जन स्वास्थ्य कार्यालयमा आज भएको दादुरा रुबेला विरुद्धको खोप अभियान अन्तर्गत पत्रकारसँगको अन्तरक्रिया कार्यक्रममा यसबारेमा जानकारी गराईएको हो । कार्यक्रममा जन स्वास्थ्य कार्यालयका निमित कार्यालय प्रमुख महेश साहले रौतहटमा दुई चरणमा गरी खोप शिविर सञ्चालन हुने जानकारी दिएका छन ।

जिल्लाको १८ वटा स्थानीयतह रहेकोमा पहिलो चरण अन्तर्गत फाल्गुण १ गतेदेखी ९ गतेसम्म रौतहटको गुजरा, वृन्दावन, कटहरिया,गरुडा, देवाही गोनाही र राजदेवी नगरपालिका साथै दुर्गाभगवती र यमुनामाई गाउँपालिकामा खोप शिविर सञ्चालन हुने छ ।

त्यस्तै दोश्रो चरणमा फाल्गुण १५ गतेदेखी २३ गतेसम्म बाँकी स्थानीयतहहरु माधवनारायण, गढिमाई, ईशनाथ, परोहा, गौर,चन्द्रपुर सहित सबै स्थानीयतहमा खोप शिविर सञ्चालन हुने जन स्वास्थ्य कार्यालयका निमित कार्यालय प्रमुख साहले जानकारी दिए । यस जिल्लाका १ लाख १९ हजार ५ सय ५१ बालबालिकालाई दादुा रुबेला विरुद्धको खोप खुवाईन लागिएको बताईएको छ ।

बालबालिकालाई दादुरा विरुद्धको रुबेला रोग लाग्नबाट जोगाउन सरकारले प्रत्येक स्थानीयतहमा खोप शिविर सञ्चालन गरेर खोप लगाउन लागेको हो । अन्तरक्रिया कार्यक्रममा स्वास्थ्य कार्यालयका साह र चिकित्सक अनिल कर्णले प्रशिक्षण दिनुभएको छ । कार्यक्रममा जिल्लाका दर्जनौ पत्रकारहरुको सहभागिता रहेको थियो ।

यसैविच सरकारले पहिलो चरणमा प्रदेश १, २ र ५ का ३ सय ३४ स्थानीयतहमा खोप अभियान सञ्चालन गर्न लागिएको छ भने ३५ जिल्लाका १८ लाख २४ हजार ४ सय ३३ बालबालिकालाई खोप खुवाइने लक्ष्य छ । यस्तै दोस्रो चरण अन्तर्गत चैत महिनामा प्रदेश ३, गण्डकी प्रदेश, कर्णाली प्रदेश र सुदूरपश्चिम प्रदेशका ४३ जिल्लाका ११ लाख ५७ हजार ७ सय ७१ बालबालिकालाई खोप लगाउने तयारी पुरा गरिएको छ ।

स्वास्थ्य तथा जनसंख्या मन्त्रालयद्वारा प्रकाशित कार्यक्रम सञ्चालन पुस्तिकामा उल्लेख भएअनुसार पहिलो र दोस्रो चरण गरी विभिन्न १९ जिल्लामा पोलियो थोपासमेत खुवाइनेछ । तत्कालिन गाविसको हकमा प्रत्येक वडामा एक र नगरपालिकामा २ वटा खोप केन्द्र निर्धारण गरिएको छ । आवश्यकता अनुसार खोप केन्द्रको संख्या बढ्न पनि सक्ने स्वास्थ्य मन्त्रालयले जनाएको छ ।