धनुषा : गरिब बस्तीमा अपन मिथिला सेवा समाजको न्यानो कम्बल

न्यूज ब्यूरो, धनुषा । समाजिक संस्था अपन मिथिला सेवा समाजले धनुषामा कम्बल वितरण गरेको छ ।

संस्थाले न्यानो कपडाको अभावमा कष्टकर जिवनयापन गरिरहेका धनुषाको दुई स्थानमा कम्बल बाँडेको हो । धनुषाको मिथिला विहारी नगरपालिकास्थित वडा नम्बर ४ कजरा रमौल र धनुषाधाम नगरपालिका २ स्थित जुगेश्वरपुरमा कम्बल वितरण गरेको संस्थाले जनाएको छ ।

समाजिक क्षेत्रमा काम गर्दै आएको उक्त संस्थाले कजरा रमौलमा एकसय पाँच र जुगेश्वरपुरमा २५ गरी एकसय ३० जना विपन्न तथा गरिबलाई कम्बल वितरण गरेको केन्द्रीय अध्यक्ष मंसाराम यादवले जानकारी दिए । कठ्यांग्रिदो जाडोमा आर्थिक विपन्नताले कष्टकर जीवनयापन गरिरहेका बेला अपन मिथिला सेवा समाजले न्यानो प्रदान गरेको हो ।

जाडोमा जसोतसो दिन काटिरहेका उनीहरुले न्यानो कम्बल पाएपछि खुशी हुँदै संस्थाप्रति आभार प्रकट गरे । कम्बल वितरण कार्यक्रममा नेकपा नेता तथा प्रदेश सांसद रामचन्द्र मण्डल, अपन मिथिला सेवा समाज नेपालका अध्यक्ष मंसाराम यादव, कोषाध्यक्ष सतिष कापर, उपाध्यक्ष भरत चौधरी यादव, सचीव पप्पु मिश्रा, सदस्य सत्रोहन मण्डल लगायतको सहभागिता थियो ।