सर्लाही : मामालाई बाबु बनाएर नागरिकता लिने भारतीय भान्जा फन्दामा

न्यूज ब्यूरो, सर्लाही । सर्लाहीमा झुटो विवरण पेस गरी मामालाई बाबु बनाएर नागरिकता लिने एक भारतीय नागरिक पक्राउ परेका छन् ।

पक्राउ पर्नेमा भारतको बिहार सितामाढी घर भएका २० वर्षीय सिताराम सिंह छन् । सिंहलाई बरहथवाबाट पक्राउ गरिएको प्रहरीले जनाएको छ । सर्लाहीको बरहथवा नगरपालिका–२ घर भएका आफ्नै मामा गिर्जबहादुर भण्डारीलाई बाबु बनाएर नेपाली नागरिकताको प्रमाणपत्र लिएको खुलेको छ ।

मामालाई बाबु बनाएर नागरिकता लिएको थाहा पाएपछि वडा नम्बर २ का वडाध्यक्ष यज्ञबहादुर खड्काको पहलमा शनिबार बेलुका हजरियाबाट पक्राउ गरी उनलाई इलाका प्रहरी कार्यालय बरहथवामा बुझाइएको सर्लाही प्रहरीले जनाएको छ ।

सिंहले वडा कार्यालयमा गाँउका पाँच जनालाई सर्जिमिन मुचुल्का गर्न लगाई नागरिकता लिएको खुलेको छ । भारतीय मुलका भान्जालाई नागरिकता बनाइदिने मामा भने फरार रहेका छन् । उनको खोजी कार्य भइरहेको प्रहरीले जनाएको छ ।