वडावडामा मेयर मण्डलको कम्बल

न्यूज ब्यूरो, जनकपुरधाम । तराई मधेशमा शितलहर बढेसँगै विभिन्न स्थानीय तहका सरकारले आफ्नो जनताप्रति जागरुक भएका छन् ।

सोही क्रममा शितलहर र चिसोलाई मध्यनजर गर्दै धनुषाको हँसपुर नगरपालिकाका मेयर रामज्ञान मण्डलले विपन्न समुदायमा न्यानो कम्बल वितरण गर्नुभएको छ । नगरका दलित, अल्पसँख्यकहरुमा पनि विपन्न, अतिविपन्न परिवारको घर घर पुगेर आफैंले न्यानो कम्बल बाँडेका हुन् । शितलहरबाट बच्नको लागि नगरको विपद व्यवस्थापन समितिको मार्फत न्यानो कम्बल वितरण गर्नुभएको छ ।

नगरपालिकाको विभिन्न चौक चौराहा सहित अति विपन्नहरुलाई कम्बल ओढाएर शितलहरबाट बच्न आग्रह गर्नुभएको हो । तराई मधेशका जिल्लाहरुमा पुसको पहिलो सत्तादेखि बढ्दै गएको चिसोबाट बाच्नका लागि पहिलो चरणमा दलित र विपन्न परिवारलाई कम्बल वितरण कार्य शुरु गरेको बताउनुभएको छ ।

हँसपुर नगरपालिका वडा नं. ३ र ७ मा एकदर्जनबढी गरिब तथा दलितहरुलाई कम्बल वितरण गरेको छ । मेयर मण्डलले आफै दलित बस्ती तथा चौक चौराहमा गएर कम्बल वितरण गर्नुभएको हो । नगरपालिकाले ठाउँ ठाउँमा दाउराको व्यवस्था गर्न नसकेपनि दलित र विपन्न परिवारलाई शनिवार कम्बल वितरण कार्य गरेको बताइएको छ । यो भने तत्कालको लागि भएपनि दीर्घकालिन उपायको बारेमा सोचिरहेको बताउनुभयो ।