सिरहामा एम्बुलेन्स र मोटरसाइकल दुर्घटना हुँदा २ को मृत्यु

न्यूज ब्यूरो, सिरहा । सिरहामा एम्बुलेन्स र मोटरसाइकल एकापसमा ठोक्किँदा दुई जनाको मृत्यु भएको छ ।

मृत्यु हुनेमा मोटरसाइकलमा सवार सिरहा नगरपालिका १२ सारस्वरका ३५ वर्षीय विष्णु महरा र २४ वर्षीय राकेश मण्डल छन् । दुर्घटनामा परी एकजना घाइते भएका छन् ।

पूर्वपश्चिम राजमार्ग अन्तर्गत् सिरहाको गोलबजार नगरपालिका ४ मुख्य चोकमा पूर्वबाट पश्चिमतर्फ गइरहेको स. ६ प. ८०६२ नम्बरको मोटरसाइकल र विपरित दिशाबाट आइरहेको स. १ च. ६९३ नम्बरको एम्बुलेन्स एक आपसमा ठोक्कर खाएको इलाका प्रहरी कार्यालय गोलबजारले जनाएको छ ।

महराको घटनास्थलमै र मण्डलको उपचारको लागि विराटनगर लैजानेक्रममा बाटोमै मृत्यु भएको प्रहरीले जनाएको छ ।