प्रसुतिभत्ता ५०० रुपैयाँ दिने स्वास्थ्य समितिकै निर्णय : मेयर बरबरिया

न्यूज ब्यूरो, जनकपुरधाम । धनुषाको शहिदनगर नगरपालिकामा प्रसुति भत्तामा कटौति गरेको तथा प्रसूति भत्तामा पनि जनप्रतिनीधिले कमिशन खाएको आरोप लगाएपछि नगर प्रमुख उदय कुमार बरबरिया (यादव) ले राजनीतिक प्रतिशोध र बौखलाहटको संज्ञा दिएका छन् ।

गत विहिबार नेपाली काँग्रेस नगर एकाई समितिले नगरपालिका कार्यालयमा नाराजुलुस गर्दै मेयरले भ्रष्टाचारी गरी प्रसुति भत्तामा पनि कमिशन खाएको आरोप लगाएपछि मेयर बरबरियाले उनीहरु राजनीतिक दाउ र बौखलाहट भएको बताएका छन् । उनले प्रसुति भत्ताको लागि सरकारले १००० रुपैयाँ दिने भनिएपनि बजेट अपूगका कारण स्वास्थ्य समितिबाट निर्णय गरी प्रति प्रसुति ५०० रुपैयाँ मात्र दिने निर्णय सदर भएको दाबी गरेको छन् ।

आर्थिक वर्ष २०७५/७६ को आमा सुरक्षाभत्ता वापत नगरकी प्रसुति महिलाले पाउने रु. १ हजार दिनुपर्नेमा बजेट अपूग भएपछि सबै प्रसूति महिलालाई पुग्ने गरी रु. ५०० का दरले तत्काल वितरण गर्नुपर्ने अवस्थालाई मध्यनजर गर्दै सो निर्णय नगर स्वास्थ्य समितिबाट पारित गरिएको बताएका छन् । उनले भने, - "सँस्थागत प्रसूतिको सँख्या १ हजार ४० भएपछि उनीहरुलाई चाहिने भत्ता अपुग भएको थियो । त्यतिबेला कसैलाई दिने र कसैलाई नदिने कुरा भएन, त्यस अवस्थामा स्वास्थ्य समितिको बैठक बसी प्रत्येक सँस्थागत प्रसूति महिलालाई तत्काल रु. ५०० का दरले वितरण गर्ने निर्णय गरियो र वितरण पनि गरियो, यो निर्णय मैले एक्लै गरेको निर्णय होईन, स्वास्थ्य समितिको निर्णय थियो र यसलाई सदर पनि त्यति बेला गरियो । त्यतिबेला कुनै सदस्य किन बोलेनन, आज त्यही व्यक्ति आएर बौखलाहट निकालेर समस्या समाधान हुन्छ त ?"

गत असोज १४ गते बसेको स्वास्थ्य समितिको बैठकबाट आर्थिक वर्ष २०७५/७६ को मात्र सँस्थागत प्रसूतिको सँख्या बढेको र प्रसूति भत्ता अपुग भएको भन्दै उनीहरुलाई सबैलाई पुग्ने गरी रु. ५०० का दरले वितरण गरिएको जनाइएको छ । नेपाली काँग्रेसका कार्यकर्ताहरुले मेयर बरबरिया प्रसूति भत्तामा पनि कमिशन खाएर १ हजारको सट्टा ५०० रुपैयाँ मात्रै दिएर प्रति प्रसूति ५०० रुपैयाँ खाएको भनेर आरोप लगाउँदै वृद्धवृद्धाहरुलाई बलपूर्वक नाराजुलुसमा सहभागी गराएको बताइएको छ ।

यो पनि पढनुहोस् : निकासा जति वृद्धभत्ता दिसकेको, काँगेसको विरोध सुनुयोजित : मेयर बरबरिया

न्यूज ब्यूरोसँग कुराकानी गर्दै मेयर बरबरियाले एक प्रश्नको जवाफमा उनले नेपाली काँग्रेसका कार्यकर्ताहरु आफू कार्यालयमा हुँदा कहिले पनि नआउने र कार्यालय बाहिर हुँदा बेतुका आन्दोलन गर्न लगाउने प्रवृति शहिदनगरवासी बुझिसकेको बताउँदै बलपूर्वक जेष्ठ नागरिकहरुलाई पनि कान भरेको आरोप लगाए । कार्यपालिकामा सवै दलको सहभागिता र सबैको सहमतिमा निर्णय भएपनि उनीहरुले अनाश्यक बखेडा खडा गरी कुप्रचार गरेको पनि आरोप लगाए ।

"जति भत्ता वितरण गरेका छौं त्यसमा भत्ता बुझने प्रसूति महिलाको औठाछाप वा हस्ताक्षर बजाबतै छ , हामीले रु. ५०० का दरले वितरण गरेका छौं र यो कुरा भनेर मात्र होईन लेखेर पनि त्यसमा समावेश गरिएको छ । अब . ५०० रुपैयाँ भत्ता बुझाएको बजाबतै लेखिएको छ भने मैले कमिशन कहाँ र कसरी खाए त्यो प्रमाणित गर्नु परेन ? राजनीतिक पार्टी आफ्नो ठाउँमा छ र जनप्रतिनीधि आफ्नो ठाउँमा छ । यस बखत म कुनै पार्टी भन्दा पनि जनप्रतिनीधि हुँ र सबैको हुँ । मसँग सन्तुष्ट नभएको खण्डमा उजुरी गर्न पाउने स्वतन्त्रता छ, म गलत गर्दैछु भनेर सचेत गराउने पनि अधिकार र दायित्व नगरवासीको छ । तर कुप्रचार गरी मान सम्मानमा ठेस पुरयाउने हक कसैलाई पनि छैन ।" - उनले भने ।

स्वास्थ्य समितिको निर्णय भएकोले गत आर्थिक वर्षमा आमा सुरक्षा भत्ता कार्यक्रम अन्तर्गत रकम घटाएर सबैलाई पुग्ने गरी बाँडिएको जनाउँदै चालु आर्थिक वर्षको लागि बजेट पहुँच भए रु. १००० कै दरले वितरण गर्ने जानकारी उनले दिए । यता, स्वास्थ्य समितिका वडा सँयोजक एवम वडा नं. ६ का वडाध्यक्ष समेत रहेका नागेन्द्र मण्डलले पनि स्वास्थ्य समितिकै निर्णय अनुसार उक्त भत्ता उपलब्ध गराएको बताएका छन् ।

गत विहिबार नेपाली काँग्रेसका कार्यकर्ताहरुले नगरपालिकामा मेयर र नगरपालिका विरुद्ध नाराबाजी गरेका थिए भने त्यस उपर बोल्दै मेयर बरबरियाले त्यसलाई राजनीतिक बौखलाहट मात्र भएको प्रतिक्रिया दिएका छन् ।