राष्ट्रिय जनगणनामा अब शिक्षक होईन, युवा खटाइने !

न्यूज ब्यूरो, काठमाडौं । राष्ट्रिय जनगणना २०७८ मा शिक्षक नखटाइने भएको छ ।

केन्द्रीय तथ्यांक विभागले आइतबार पत्रकार सम्मेलन गरी सबैको सुझावअनुसार जनगणनामा शिक्षकहरुलाई नखटाउने निर्णय गरिएको जानकारी दिएको हो । उच्च शिक्षा हासिल गरेका स्थानीय बेरोजगार युवाहरुलाई तीन महिनाका लागि गणक र सुपरीवेक्षकका रुपमा भर्ना गर्ने विभागको तयारी छ ।

गणक र सुपरीवेक्षकबाहेक अन्य जनशक्ति भने सरकारी कर्मचारी नै हुनेछन् । उनका अनुसार ४३ हजार २७७ गणक र ९ हजारभन्दा बढी सुपरीवेक्षक नयाँ भर्ना गरिनेछ । सबै गरेर जनगणनामा ५४ हजार ४ सय १३ जना खटिने जनसंख्या निर्देशक लामिछानेले जानकारी दिए ।

जिल्लास्तरमा चाहिने गणक जिल्लाकै तथ्यांक कार्यालयले भर्ना गर्नेछ । २०७८ जेठ २८ गतेदेखि १५ दिनसम्म गणकहरु देशका सबै घरमा खटिएका जनगणना गर्नेछन् । तथ्यांक विभागले राष्ट्रिय जनगणना २०७८ को लोगो र नारा पनि सार्वजनिक गरेको छ । यससँगै युवाहरु अवसर पाउने भएपछि यस निर्णयको स्वागत गरिएको छ ।