सप्तरीमा मोटरसाइकल ठोक्किँदा २ को मृत्यू

न्यूज ब्यूरो, सप्तरी । पूर्वपश्चिम राजमार्गअन्तर्गत सप्तरीको खड्क नगरपालिका(८ स्थित बिसनपुर चोकमा मोटरसाइकल ठोक्किँदा दुई जनाको ज्यान गएको छ ।

दुर्घटनामा परेर दुईजना घाइते भएका छन् । दुर्घटनामा सुरुङ्गा नगरपालिका–१, पिपरा बस्ने २७ वर्षीय अरविन्द चौधरी र खड्क नगरपालिका–६ बिसनपुरका २८ वर्षीय अनबारुल अन्सारीको ज्यान गएको प्रहरीले जनाएको छ ।

पूर्वबाट पश्चिमतर्फ जाँदै गरेको बा६८प ६८८७ र विपरीत दिशाबाट आउँदै गरेको ज६प ५८५३ नम्बरको मोटरसाइकल ठोक्किएको थियो । दुर्घटनामा घाइते चौधरी र अन्सारीको लहानस्थित राउ स्मारक अस्पतालमा उपचारका क्रममा ज्यान गएको प्रहरीले जनाएको छ ।

दुर्घटनामा पिपराका १८ वर्षीय देवानन्द चौधरी र बिसनपुरका ४० वर्षीय मोहम्मद किसुधीन घाइते छन् । उनीहरूलाई उपचारका लागि विराटनगरस्थित गोल्डेन अस्पताल पठाइएको प्रहरीले जनाएको छ ।