घोर अन्धविश्वास : मन्त्रतन्त्रबाट छोरा जन्मिने भन्दै लाखौँ ठग्ने महिला फन्दामा

न्यूज ब्यूरो, रौतहट । रौतहटमा मन्त्र तन्त्रबाट छोरा जन्मिने भन्दै प्रलोभन दिएर ठगी गर्ने एक महिला पक्राउ परेकी छन् ।

रौतहटको गढीमाई नगरपालिकास्थित नट टोलकी ४५ बर्षिया जैतुन खातुनले दुईछोरी मात्र रहेका रौतहटको कटहरिया नगरपालिका ५ का रामबाबु महरा चमारलाई छोरा जन्मिने भन्दै एक लाख ५० हजार रुपैयाँ ठगी गरेको भेटिएको हो । जडीबुटीको उपचार र पाँच प्रकारको बली दिएर मन्त्रतन्त्रबाट छोरा हुने प्रलोभनमा देखाउँदै उनले ठगी गरेको प्रहरीले जनाएको छ ।

उनले ठगी गरेको पाइएपछि स्थानीय पत्रकार संजय मिश्राको पहल र रौतहटका प्रहरी उपरीक्षक भुपेन्द्र खत्रीको निर्देशनमा रकम फिर्ता गराइएको छ । खातुनले महराको श्रीमती समेत र एक महिला समेतलाई प्रभावमा पारेर पटकपटक गरी सो रकम ठगेकी थिइन् ।