रौतहटमा ४५ जना अपांगता भएका व्यक्तिलाई ट्राइसाइकल

न्यूज ब्यूरो, रौतहट । रौतहटमा अपांगता भएका ४५ जना व्यक्तिलाई ट्राइसाइकल बाँडिएको छ ।

अपांगता भएका व्यक्ति आफैमा पीडित भएको हुनाले त्यस्ता व्यक्तिलाई सबैले समान रुपमा हेर्नुपर्ने मान्यताका ट्राइसाइकल वितरण गरिएको हो । रौतहटको कटहरिया र मौलापुरमा नगरपालिकामा आज आयोजित अपाङ्गता भएका व्यक्तिका लागि नि शुल्क ह्वील चियर तथा ट्राइसाइकल वितरण गरीएको छ ।

रौतहट क्षेत्र नं ३ को ख का प्रदेश सांसद कुन्दन कुश्वाहाको प्रमुख आतिथ्यमा आज कटहरिया र मौलापुर नगरपालिका गरी ४५ जना अपाङ्गता भएका व्यक्तिले ह्वील चियर र ट्राइसाइकल पाएका छन् । कटहरिया नगरपालिकाको कार्यालय कटहरियामा आयोजित कार्यक्रममा प्रदेश सांसद कुश्वाहाले २१ जना अपाङ्गता भएका व्यक्तिलाई ह्वील चेयर र १ जनालाई ट्राइसाइकल निशुल्क वितरण गरेका हुन् ।

कटहरिया नगरपालिकाका मेयर शियाराम कुश्वाहाको अध्यक्षतामा भएको कार्यक्रममा नगर अन्तर्गतका रहेका अपाङ्गता भएका व्यक्तिलाई उक्त चेयर र साइकल वितरण गरिएको छ । त्यस्तै आजै मौलापुर नगरपालिकाको आयोजनामा मौलापुरमा आयोजित कार्यक्रममा प्रमुख अतिथि कुन्दन कुश्वाहाले नगर अन्तर्गतका १८ जनालाई ह्वील चेयर र ५ जनालाई ट्राइसाइकल निशुल्क वितरण गरेका हुन् ।

रास्ट्रिय अपाङ्ग पुनस्र्थापना समाज अनामनगर काठमाडौंको आर्थिक सहयोगमा अपाङ्गहरुलाई उक्त साइकल सहयोग गरिएको प्रमुख अतिथि कुश्वाहाले बताए ।

मौलापुर नगरपालिकाकी मेयर रिना कुमारी साहको अध्यक्षतामा भएको कार्यक्रममा रास्ट्रिय अपाङ्ग पुनस्र्थापना समाज अनामनगरका उपाध्यक्ष सुगम भट्टराई, कटहरियाका मेयर शियाराम कुश्वाहा लगाएतकाले अवसर पाए अपाङ्ग पनि केहीमा पछाडि नपर्ने दावी गरेका थिए ।