धनुषाको कमला नगरपालिका पनि खुल्ला दिशामुक्त नगर घोषणा

न्यूज ब्यूरो, धनुषा । धनुषाको कमला नगरपालिकालाई शनिबार जिल्लाको १५ औ खुल्ला दिशामुक्त नगर घोषणा गरिएको छ ।

नेपाल सरकारले केही दिनभित्रै नेपालको हरेक जिल्ला सहित पालिकालाई खुल्ला दिशामुक्त क्षेत्र घोषणा अभियानलाई तिव्रता दिँदै कमला नगरपालिकालाई खुल्ला दिशामुक्त नगरको रुपमा घोषणा गरिएको हो । नगरपालिकाका नगर प्रमुख राम उदगार गोईतको अध्यक्षता तथा जिल्ला समन्वय समितिका अध्यक्ष रामदेव यादवको प्रमुख आतिथ्यमा सम्पन्न एक समारोहको क्रममा खुल्ला दिशामुक्त नगरको प्रमाण पत्र प्रदान गरिएको हो ।

धनुषाको पूर्वी क्षेत्र र धनुषा तथा सिरहाको सीमाको रुपमा रहेको कमला नदीको सीमासँगै रहेको कमला नगरपालिकाले विकासको पूर्वाधार भर्खरै खडा गरेपछि केही दिनमै खुल्ला दिशामुक्त नगर घोषणा गरिएको जनाइएको छ । स्थानीय जनप्रतिनीधिहरुको आन्तरिक किचलोका कारण विकास निर्माणका कार्यहरु नहुँदा खुल्ला दिशामुक्त क्षेत्र घोषणा गर्न पनि पूर्वाधार तयार नभएको अवस्था थियो । गत आर्थिक वर्षमा विकास निर्माणका कार्यहरु एकाएक तीव्रता पाएपछि केही महिनामै नगरलाई स्वच्छता तर्फ अग्रसर गर्न सफल भएको बताइएको छ ।

सो कार्यक्रममा जिल्ला समन्वय समितिका अध्यक्ष यादवले कमला विकास पूर्वाधार छिट्टै निर्माण गरी खुल्ला दिशामुक्त नगरको रुपमा घोषणा गर्न सफल भएको भन्दै स्थानीय जनप्रतिनीधिहरुलाई धन्यवाद ज्ञापन गरे । उनले मेयर, उपमेयर, वडाध्यक्ष, वडासदस्य र खुल्ला दिशामुक्त अभियानका अभियानी संघ सँस्थाहरुलाई समेत धन्यवाद ज्ञापन गर्दै स्वच्छता अभियानलाई निरन्तरता दिनको लागि आम जनसमुदायमा आग्रह समेत गरे ।

कार्यक्रममा अध्यक्षताको आसनबाट बोल्दै नगर प्रमुख राम उदगार गोईतले नगरवासीलाई सम्बोधन गर्दै खुल्ला दिशामुक्त नगरको घोषणा गराउन गरेको सहयोगप्रति आभार प्रकट गरे । उनले कमला नगरपालिकालाई स्वच्छताको अभियानमा सहयोग गरेका नगरका हरेक नागरिकको सहयोग अपरिहार्य रहेको बताउँदै खुल्ला ठाउँमा दिशापिसाबले हुने संक्रमणबाट बच्न भावी पुस्तालाई समेतको लागि खुल्ला दिशामुक्त क्षेत्र नगरको रुपमा परिवर्तित गर्नु आवश्यकता औल्याए ।

सो समारोहमा नगरपालिकाका प्रमुख प्रशासकीय अधिकृत उमेश यादवले कमला नगरपालिकालाई खुल्ला दिशामुक्त नगरको रुपमा घोषणा गर्न पाउँदा गर्व महसुस भएको अनुभूति सुनाए । "कमला नगरपालिकालाई स्वच्छताको लागि यहाँका नागरिकले खेलेको भूमिका र नगरका कर्मचारी तथा अभियानका अभियानीहरुप्रति आभार प्रकट गर्न चाहन्छु । यहाँका नागरिकको सहयोग बीना हामी केही गर्न सक्ने थिएनौं, तपाईहरुको सहयोग अपरिहार्य छ , आगामी दिनमा पनि यसलाई मूर्तरुपलाई निरन्तरता दिनको लागि सहयोगको अपेक्षा जाहेर गर्दछु ।" - उनले भने ।

समारोहमा कलमा नगरपालिका वडा नं. १ का वडाध्यक्ष राजकुमार यादवले समेत प्रमुख अतिथि रामदेव यादवलाई स्वागत गर्दै आफ्ना वडाका वडावासीलाई धन्यवाद ज्ञापन गरे । यसै गरी ९ वटै वडाका वडाअध्यक्ष तथा जनप्रतिनीधिहरुलाई सम्मान समेत गरिएको थियो । कार्यक्रममा नगर उप्रमुख शिला देवी मण्डल सहित नगरपालिकाका कर्मचारीहरु चन्दप्रकाश यादव सहित अन्य कर्मचारीहरुलाई प्रमुख अतिथि तथा नगर प्रमुखबाट कदर पत्र प्रदान गरिएको थियो ।

खुल्ला दिशामुक्त घोषणा समारोहमा ९ वटै वडाका सर्वसाधारण, बुद्धिजीवी, गैर सरकारी सँघसँस्थाका प्रतिनीधि, युवा, महिला, विद्यार्थीहरुको सहभागीता रहेको थियो ।