धनुषामा प्रहरीद्धारा भारी परिमाणमा अवैध घरेलु मदिरा नष्ट

न्यूज ब्यूरो, धनुषा । धनुषामा प्रहरीले भारी परिमाणमा अवैध घरेलु मदिरा नष्ट गरेको छ ।

ईलाका प्रहरी कार्यालय ढल्केवरले मिथिला नगरपालिका ६ स्थित ढल्केवर चोकमा सवारी चेकजाँच गर्ने क्रममा बरामद गरेको भण्डै ३ सय ६० लिटर अवैध घरेलु मदिरा नष्ट पारेको हो ।

अवैध घरेलु मदिरा ओसारपोसार भइरहेको गोप्य सूचनाको आधारमा खटेको प्रहरी टोलीले उक्त मदिरा बरामद गरेको ईप्रका ढल्केवरका प्रहरी निरीक्षक अवध किशोर ओझाले बताए । बरामद गरिएको मदिरा स्थानीय जनप्रतिनिधि, महिला सञ्जाल, गाउँ समाजका विभिन्न भद्रभलादमीहरुको रोहबरमा नष्ट पारिएको उनले जनाए ।

मदिराका कारण दिनहु समाजमा झै–झगडा, घरेलु हिंसा, महिला हिंसा लगायतको घटनामा बृद्धि भइरहेको समयमा प्रहरीले स्टिंग अपरेशनमा सक्रियता बढाएको हो ।