अमिसेसको समाजसेवामा सक्रियता : महोत्तरीका ठाकुर परिवारलाई आर्थिक सहयोग

न्यूज ब्यूरो, जनकपुरधाम । पछिल्लो समय समाजिक कार्यमा कम्मर कसेर लागेका मधेशी मूलका नेपालीहरुको समाजिक संगठन अपन मिथिला सेवा समाज महोत्तरीको एक अत्ति विपन्न परिवारलाई मलहम लगाएका छन् ।

महोत्तरीको सोनमा गाउँपालिका वडा नं. ३ स्थित रघुनाथपुरका स्व. रामएकवाल ठाकुरको परिवारलाई समाजले आर्थिक सहयोग गरेको हो । मेहनेत, मजदुरी गरेर परिवार पालिरहेका ठाकुरको अल्पआयुमै निधन भएपछि विचल्लीमा परेका उनको परिवारलाई अपन मिथिला सेवा समाजद्धारा नगद २० हजार रकम आर्थिक सहयोग गरिएको छ ।

आर्थिक अवस्था एकदमै जर्जर रहेको ठाकुरको करिब ५० वर्षकै उमेरमा ५ वर्षअघि नै विरामी भएर मृत्यू भएपछि उनको परिवारको विजोग भएको अवस्था छ । ठाकुरकी अन्दाजी ४० वर्षीया पत्नी धनकुटिया देवि ठाकुर बोली विहिन भएकी कारण कहिँकतैबाट आम्दानीको श्रोत नहुँदा छाक टार्नसमेत मुस्किल परेको छ ।

स्थानीयहरुकै साहारामा बाँचिरहेको ठाकुर परिवारमा पत्नीसहित एक १२ वर्षकी छोरी, दुई ७ र ५ वर्षका छोरा गरी जम्मा ४ जना सदस्य छन् । धेरै पहिलेको पुरानो फूसको घरसमेत भत्कदा उनीहरु त्रिपाल मुनि बस्न बाध्य भएपछि स्थानीय युवा धर्वेन्द्र सिंहले पीडा हेर्न नसकेर २–३ महिनाअघि करिब ३२–३३ हजारको लागतमा एक बस्ने लायक घर बनाइदिए । अहिले उनीहरु त्यसमै शरण लिएका छन् ।

विचल्लीमा परेका उनीहरुको सहयोगको लागि गाउँपालिका लगायतका सरोकारबाला निकायमा गुहार लगाउँदा आश्वासन दिएपनि सहयोग भने केही गरिएको छैन । उनीहरुको समस्या बारे जानकारी पाएपछि रोजगारीको शिलशिलामा विभिन्न पेशामा संलग्न रही विभिन्न मुलुकमा छरिएर रहेका मधेशी मुलका नेपालीहरुको समाजिक संगठन अपन मिथिला सेवा समाज घरमै पुगेर सहयोगी भावना दर्शाएका छन् ।

यस संस्थासँग आवद्ध खाडी मुलुकहरुमा वैदेशिक रोजगारमा रहेका मधेशीहरुबाट सहयोगार्थ संकलित रकम समाजका वरिष्ठ कोषाध्याक्ष भरत चौधरी यादव, प्रदेश २ का सुपरभाईजर मन्साराम यादब, उपशाखा कतारका पूर्व अध्यक्ष शत्रुधन मण्डल, पूर्व केन्द्रीय कोषाध्यक्ष कैलाश महतो लगायतले घरमै पुगी हस्तान्तरण गरेका हुन् ।

नेपालको प्रदेश २ को अस्थायी राजधानी जनकपुरधाममा केन्द्रीय कार्यालय रहेको यस संस्थाको मलेसिया, दुबई, कतार, साउदी, कुवेत र भारत लगायत आधा दर्जनबढी खाडी मुलुकहरुमा शाखा सक्रिय संचालनमा छ । विगत कयौं वर्षदेखि समाजिक क्षेत्रमा सक्रिय रहेको यस संस्थामा आवद्ध रही स्वदेश तथा विदेशमा रहेका सदस्यहरु समाज विपत्तिमा परेका बेला निरन्तर अन्तर हृदयले सहयोगको लागि हात अगाडि बढाउँदै आएका छन् ।

अपन मिथिला सेवा समाजले समाज सुधारका लागि समेत विभिन्न प्रकारका संदेशमूलक तथा जनचेतनामूलक कार्यक्रमहरु गर्दै आएका छन् ।