महोत्तरीका बाढी पीडितलाई अपन मिथिला सेवा समाजको राहत

न्यूज ब्यूरो, जनकपुरधाम । अविरल वर्षापछिको विनाशकारी बाढीले प्रभावित परिवारलाई समाजिक संस्था अपन मिथिला सेवा समाजद्धारा राहत वितरण गरिएको छ ।

रातो खोलाको बाढीले अत्ति प्रभावित महोत्तरीको बलबा नगरपालिका–१० लेउरी गाउँका पीडित परिवारलाई अपन मिथिला सेवा समाजले राहत वितरण गरेको हो । विनाशकारी बाढीले अस्तव्यस्त बनेको सो बस्तीका एकसय २५ बढी घरपरिवारलाई राहत बाँडेको छ ।

पानीको बहाब उच्च भएर गाउँ पसेको बाढी अन्नपात समेत बर्बाद पारेपछि राहत पर्खिरहेका उनीहरुलाई राहत स्वरुप चुरा, मुरही, दालमोठ, चाउचाउ लगायतका खाद्यान्न सामाग्री वितरण गरिएको संस्थाका मंसाराम यादवले जानकारी दिए ।

बाढीका कारण जनजीवन अस्तव्यस्त बनेको सो बस्तीमा हालसम्म कत्तैबाट राहत नगएपछि निरन्तर समाजिक कार्यमा सक्रिय अपन मिथिला सेवा समाज राहत लिएर पुगेका हुन् । यस संस्थासँग आवद्ध खाडी मुलुकहरुमा वैदेशिक रोजगारमा रहेका युवाहरुको आर्थिक सहयोगमा उक्त सहयोग गरिएको हो ।

नेपालको प्रदेश २ को अस्थायी राजधानी जनकपुरधाममा केन्द्रीय कार्यालय रहेको यस संस्थाको आधा दर्जनबढी खाडी मुलुकहरुमा शाखा सक्रिय संचालनमा छ । खाडी मुलुक मलेसिया, दुबई, कतार, साउदी र कुवेतमा रहेका संस्थाका सदस्यहरुले सहयोगार्थ पठाएको रकमबाट सहयोग प्रदान गरिएको संस्थाले जनाएको छ ।

विगत कयौं वर्षदेखि समाजिक क्षेत्रमा सक्रिय रहेको यस संस्थामा आवद्ध रही स्वदेश तथा विदेशमा रहेका सदस्यहरु समाज विपत्तिमा परेका बेला निरन्तर अन्तर हृदयले सहयोगको लागि हात अगाडि बढाउँदै आएको छ ।