दहेज प्रथालाई अर्को तामाचा : धनुषाका यी परिवारले पनि गरे विना दाईजोको आदर्श विवाह

न्यूज ब्यूरो, जनकपुरधाम । दाईजोकै कारण नवविवाहितालाई जलाएर मार्ने, यातना दिने जस्ता कुकार्य भईरहँदा धनुषामा पुनः एक जोडीले पूर्ण आदर्श विवाह गरेर दहेजमुक्त समाजलाई टेवा पुरयाएको छ ।

धनुषाको हँसपुर नगरपालिका वडा नं. ८ बस्ने अशेश्वर साहका २८ बर्षिय छोरा ईन्जिनीयर उमेश कुमार साहले विना दाईजोको समाजरुपी आदर्श विवाहलाई मूर्तरुप दिएका छन् । ईन्जिनीयर साह सिरहा जिल्लाको भगवानपुर गाउँपालिका वडा नं. ४ बस्ने गँगा प्रसाद साहकी २४ बर्षिय छोरी अम्बिका कुमारी साहसँग आदर्श विवाह गरेर समाजलाई दाईजोमुक्त एवमे अपराधमुक्त बनाउने अभियानमा टेवा पुरयाएका हुन् ।

बिएस्सी नर्सिँग पढेकी अम्बिकासँग ईन्जिनीयर पढेका उमेशले परिवारकै सहमतिमा विवाह गरेको जनाइएको छ । प्रेम विवाहभन्दा पनि उनीहरु आदर्श विवाह गर्नको लागि सहयोग गरेको जनाइएको छ । दुवै पक्षबाट दुई परिवारलाई एक प्रगाढ सम्बन्धमा गाँस्नको लागि आदर्श विवाहलाई मान्यता दिएको उमेशका बुवा अशेश्वर साहले बताए ।

"छोरा ईन्जिनीयर हुँदैमा, वा छोरालाई ईन्जिनीयर पढाएको हुँ भनेर धाक लगाउँदै २० लाख, ३० लाख रुपैयाँसम्म माग्ने र दिनेबाला पनि धेरै हेरे । तर के बेहुली पक्षले कम खर्च गरेर आफ्नी छोरीलाई पढाएको होला र ? मेरो छोरा जस्तै त उनले पनि आफ्नी छोरीलाई त्यतिको खर्च गरेर पढाएको होलान । अरुको सम्पत्तिमा हामीलाई केको लोभ ? हामीले सम्बन्ध गाँसेका छौँ, सम्पति र दाईजोमा हिस्सा लिनको लागि होईन । हामीले छोरी स्वरुप बुहारी पाएका छौँ, यो भन्दा बढी हामीलाई के चाहियो ?"- अशेश्वरले भने ।

गत बैशाख १३ गते भएको विवाह अघि दुवै परिवारबीच दाईजो लाई लिएर असन्तुष्टि देखिएपनि बेहुला पक्षले एक रुपैयाँ पनि दाईजो नलिने पक्षमा अडान लिएपछि बेहुली पक्षले आदर्श विवाहको लागि तयार भएको बुझिएको छ । तराई मधेशमा दाईजो नमागेपनि आफ्नी छोरीलाई त्यतिकै विदाई नगर्ने भनेपछि दाइजोकै नाम दिएर तिलक दिने गरेको देखिएको छ ।

छोरीलाई केही नदिएको भनेर समाजले के सोच्ला भनेर पनि डरले दाईजो नमागेको भएपनि उनीहरु आफै दाईजो लिनको लागि चाप दिइएको देखिएको छ । आदशै विवाह धुमधामका साथ सम्पन्न गरि दुवै परिवारले सुमधुर सम्बन्ध गाँसेको बताए । बीना दाईजोको विवाह गरेर उनीहरु समाजको एक कुशल नागरिकको परिचय दिएका हुन् ।