शहिदनगरका युवाहरुलाई नगरपालिकाद्धारा १ महिने निःशुल्क मेसन तालिम

न्यूज ब्यूरो, जनकपुरधाम । धनुषाको शहिदनगर नगरपालिकामा एक महिने मेसन तालिम सम्पन्न गरिएको छ ।

शहिदनगर नगरपालिका कार्यालयको सहयोगमा सँचालित एक महिने सुरक्षित आवास निर्माण तथा मेसन तालिममा नगरपालिकाको विभिन्न वडाका युवकहरुलाई सहभागी गराई सुरक्षित आवास निर्माण गर्ने सम्बन्धी दक्षता प्रदान गरिएको नगरपालिकाका मेयर उदय कुमार बरबरियाले जनाए ।

युवा स्वरोजगार अन्तर्गत बेरोजगारी न्यूनिकरण गर्ने उदेश्यले ईच्छुक युवाहरुलाई नगरपालिकाको आर्थिक सहयोगमा ईनोभेटिक ईन्जिनीयरिँग सोल्युशन प्रा.लिको प्राविधिक सहयोगमा नगरपालिकाका युवाहरुलाई स्थानीय स्तरमै रोजगारीको लागि दक्ष बनाइएको बताए ।

सो समापन कार्यक्रमको दौरान सहभागीहरुलाई दक्षताको प्रमाणपत्र समेत वितरण गरिएको थियो ।

सो क्रममा नगरपालिकाको तर्फबाट उनीहरुलाई तालिम सहित अन्तिम दिन कामदारहरुले लगाउने सेफ्टी ज्याकेट, हेल्मेट सहितको प्राविधिक समाग्रीहरु समेत प्रदान मेयर बरबरियाले गरेका हुन् । कार्यक्रमको समापनमा प्रमुख अतिथिको आसनबाट बोल्दै मेयर बरबरियाले भने, - "उनीहरुलाई सुरक्षित आवास निर्माणको लागि दक्ष बनाइएको छ । स्थानीय स्तरमै उनीहरुले बेरोजगार बस्नुपर्ने अवस्था रहेनन, तालिम लिएका युवाहरुले नगरपालिकाभित्रै वा नगरपालिका बाहिरै पनि आफ्नै देशमा जहाँ गएर पनि दक्षताका साथ काम गर्न सक्छ । उनीहरुलाई प्राविधिक सहयोग गर्ने सँस्थाका तालिम प्राप्त एवम् दक्ष प्राविधिकद्धारा तालिम गराइएको छ । उनीहरुले त्यसलाई व्यवहारमा उतार्न सके तत्कालै उनीहरुको बेरोजगारीको समस्या केही हदसम्म न्यून हुने विश्वास छ ।"

कार्यक्रमको समापनमा नगरपालिकाका प्रमुख प्रसासकीय अधिकृत नन्द कुमार झा, ईलाका प्रहरी कार्यालय यदुकूहाका इंस्पेक्टर भीम बहादुर खड्का, सशस्त्र प्रहरी बल यदुकोहाका इंस्पेक्टर किस्मान तमांग , मानव बिकास केन्द्रका कुन्दन झा लगायतले समापन मनतव्य राखेका थिए ।

तालिममा सहभागी युवकहरुले कान्छो मेयर बरबरियाले स्थानीय स्तरमै तालिमको व्यवस्था गरिदिएपछि कृतज्ञता प्रकट गर्दै कार्यक्रमकै दौरान प्रशंसा समेत गरेको थियो । नगरपालिकाका युवाहरुलाई बेरोजगारीको रेखामुनीबाट माथि लैजाने मिशनमा रहेका मेयर बरबरियाले प्रथम चरणमा केही युवाहरुलाई प्राविधक दक्षता प्रदान गरी दक्ष जनशक्ति उत्पादन गर्न सफल भएका छन् ।