धनुषामा एक अत्ति विपन्न मुसहरलाई अमेरिकाबाट पाकिस्तानीको सहयोग

न्यूज ब्यूरो, जनकपुरधाम । धनुषाको लक्ष्मीनियाँ गाउँपालिका–३ सिनुरजोडा गाउँमा अत्ति विपन्न मुसहर परिवारलाई लत्ता कपडा तथा खाद्यान्न सामाग्री सहयोग गरिएको छ ।

सिनुरजोडाको पश्चिमवारी टोलका ४४ घरपरिवारमध्ये अति विपन्न परिवार अघनु सदा र सुभदर सदाका परिवारलाई पत्रकार दिपेन्द्र सिंह र शिक्षा अभियन्ता समाजसेवी राधा कोइरालाको पहलमा पाकिस्तानका नागरिक हाल अमेरिकामा बसोवास गर्दै आएका डा. अरिफ मोहम्मदको आर्थिक सहयोगमा लत्ताकपडा र खाद्यान्न सामाग्री प्रदान गरिएको हो ।

शनिवार सिनुरजोडास्थित सादाको घरमै पुगेर लक्ष्मीनियाँ गाउँपालिकाका वाडा सदस्य लक्ष्मीनियाँ देवी सादाको हातबाट सो सामाग्री प्रदान गरिएको हो ।

सदा परिवारको आर्थिक अवस्था निकै कमजोर रहेको र सानो झुपडी भित्र ५ जनाको परिवार १० वर्षदेखि जीवनयापन गरिरहेको भनि सामाजिक संजाल र विभिन्न संचार माध्यममा सामाचार प्रकाशित र प्रसारित भएपछि उनको घरमा विभिन्न संघ, संस्थाहरुले सहयोग गर्ने क्रममा पाकिस्तानी नागरिक डा.अरिफ मोहम्मदले संचालन गरेको रेस्पोन्स यु. एस. ए.संस्थाद्धारा पठाइएको २० हजार नेपाली रुपैया बरावरको २ थान दसना, तन्ना, ३ थान सिरहानी, ३ थान साडी सेटलगायत परिवारका ५जनाको लागि गंजी, पैन्ट,जिन्स पाइन्ट,भेष्ट, ३०किलो चामल, ५किलो दाल, ५किलो चिनी, ५ किलो प्याज, ५ किलो चना, ५ किलो तोरीको मशाल तेल, ५ किलो नुन, ५ किलो च्युरालगायतको मशाला सामाग्रीहरु र उनको परिवारका नवजात बच्चाका लागि ब्लान्केट, कपडा, झुललगायतको सामाग्रीहरु प्रदान गरिएको छ ।

अति विपन्न परिवारका सुभदर सदाले ११ दिन पहिले एक छोरीको जन्म दिएको छ । पौष्टिक आहार खान नपाएर शरिरमा कमजोरी भएको गुनासो गरेपछि सामाजिक संजालमा गरेको पोष्ट र सहयोगको लागि गरिएको अपिलपछि सदा परिवारलाई यस अघि पनि केही संघ, संस्थाहरुले सहयोग गरेको थियो ।

उनको बस्ने घरको निकै समस्या देखिएको र पारिवारिक अवस्था निकै कमजोर भएकाले उनलाई अझै सहयोगको आवश्यकता रहेको सामाजिक अभियन्ता राधा कोइरालाको भनाई रहेको छ ।

यस अघि सादाको घरमै पुगेर धनुषाका प्रमुख जिल्ला अधिकारी प्रदिपराज कणेलले साहुले क्रटण बन्धकीको क्रममा राखेको नागरिकता फिर्ता गराउँदै रेडक्रसको सहयोगमा त्रिपाल, बाल्टिन, खाद्यान्न सामाग्री समेत प्रदान गरेका थिए भने क्लोथ बैंक जनकपुरले समेत परिवारका लागि कपडा प्रदान गरेका छन् ।

अघनु सदाकी ६७ वर्षीय आमा सिवर्ती देवी सादा आँखामा मोतियाविन्दु लागेर हृष्टिविहिन अवस्थामा रहेको छ भने अघनु सदाको समेत मानसिक अवस्था ठिक रहेको छैन ।