धनुषाबाट 'अमर्यादित' शब्दलाई किक हान्छौं : शिक्षा प्रमुख रजक

न्यूज ब्यूरो, जनकपुरधाम । आईतबारदेखि सँचालनमा आएका माध्यमिक तहको परीक्षा एसईई नीरिक्षणको क्रम जारी राखिएको छ ।

यसैक्रममा परीक्षाको तेस्रो दिन धनुषाको विभिन्न परीक्षाकेन्द्रमा पुगेका जिल्ला शिक्षा समन्वय ईकाई समितिका टोलीले नीरिक्षण गरिएको केन्द्रहरुमा परीक्षा पूर्णतः मर्यादित भएको प्रतिक्रिया दिएका छन् । बुधबार धनुषाको मावि पृतपुर पर्वता, भानु मावि किसानपुर, मावी मूलाबारी भिमान र जनता जसवाल मावि गोदारमा गरेको अनुगमन नीरिक्षणको क्रममा समितिका अध्यक्ष (प्रमुख) बरखु प्रसाद रजकले परीक्षा मर्यादित रुपमा सम्पन्न भएको बताएका छन् ।

बुधबार अनिवार्य गणितको परीक्षा चलिरहेको बेला उक्त परीक्षाकेन्द्रहरुमा अनुगमनको लागि गएका प्रमुख रजकले विभिन्न परीक्षा केन्द्रमा भित्रैबाट सेटिंग गरिएको, परीक्षार्थीको कापी बाहिरै लेखिने गरेको जस्ता गुनासो आएपछि आफ्नो ध्यानाकर्षण भएको जनाउँदै जिल्लाबाटै अर्मादित गतिविधि हटाउने प्रतिवद्धता जाहेर गरे ।

जिल्ला शिक्षा समन्वय ईकाई समिति धनुषाका टोलीले उक्त परीक्षाकेन्द्रहरुमा अनुगमन गर्दा परीक्षा मर्यादित भएको, छात्राहरुको लागि सेनेटरी प्याडको व्यवस्था गरिएको, परीक्षार्थीहरुको लागि स्वास्थ्य शिविर राखिएको पाइएको हो । आज भएको गणित विषयको परीक्षा पूर्णरुपमा मर्यादित भएको बताए ।

जनकपुरधाम उपमहानगरपालिकाको बसहियामा एक युवक ले किर्ते हस्ताक्षर र किर्ते कार्डको भरमा परीक्षाकेन्द्रमा पुगेको र त्यसपछि पक्राउ परेको प्रकरण बाहेक जिल्लाभरिमै परीक्षा पूर्ण मर्यादित भएको प्रतिक्रिया प्रमुख रजकले दिए ।

उनले भने, - "हामी कहाँ धेरै प्रकारको गुनासो आएको छ । फलानो विद्यालयको केन्द्रमा भित्रैबाट परीक्षार्थीहरुलाई चिटचोरी गराएको भनेर, हामी त्यस बखतदेखि एक्सनमा आएका छौँ र जिल्लाका सम्पूर्ण परीक्षाकेन्द्रमा निर्देशन पनि जारी गरिसकेका छौँ की त्यस्तो गतिविधि पाइएमा कानुन बमोजिमको कारवाहीको लागि कुनै कसर बाँकी राख्ने छैनौँ ।"

उनले जिल्लामा यस्ता प्रकारका गतिविधि पाइएमा तत्कालै आफूलाई खवर गर्न पनि आग्रह गरे । प्रमुख रजकको टोली परीक्षाकेन्द्रमा गएपछि परीक्षार्थीहरुले हातमा प्रश्नपत्र र कापी देखाएर चिट नभएको भन्दै स्पष्ट गरेको थियो ।

टोलीमा प्रमुख रजक सहित जिल्ला शिक्षा समन्वय ईकाइका अनिल यादव, सँचारकर्मी लगायतका रहेका थिए ।