सिरहा : एसईई परिक्षामा ९ हजारबढी परिक्षार्थी सहभागी हुँदै, गडबड गर्नेलाई यस्तो कारवाही !

न्यूज ब्यूरो, सिरहा । भोलीदेखि सञ्चालन हुने एसईई परिक्षाको सम्पूर्ण तयारी सिरहामा पूरा भएको छ । माध्यमिक शिक्षा परिक्षामा यसवर्ष सिरहाबाट १३३ विद्यालयका जम्मा ९ हजार ९ सय २ परीक्षार्थी सहभागी हुँदैछन् ।

जिल्लाका ७६ वटा सामुदायिक विद्यालय, ५६ संस्थागत विद्यालय र १ खुल्ला विद्यालय गरी कुल १३३ विद्यालयका ९ हजार ९ सय २ परीक्षार्थीहरुका लागि ३८ वटा सामुदायिक विद्यालयमा परीक्षा केन्द्र स्थापना गरिएको शिक्षा विकास तथा समन्वय ईकाइका प्रमुख दोलराज पाण्डेले जानकारी दिए ।

पाण्डेका अनुसार यस जिल्लाका नियमित तर्फ ३६, प्राविधिक तर्फ १ र ग्रेडबृद्धि तर्फ १ गरी ३८ केन्द्र निर्धारण गरिएको छ भने परीक्षार्थी मध्ये नियमति ९ हजार ६२, ग्रेडबृद्धि पुरानो पाठ्यक्रमका २ सय ७४ र नयाँ पाठ्यक्रमका ३ सय ४४ र प्राविधिक तर्फ २३४ परीक्षार्थी सहभागी हुँदैछ ।

परीक्षा संचालन गर्नका लागि प्रत्येक केन्द्रमा १ र १ केन्द्राध्यक्ष गरी ३८ केन्द्राध्यक्ष ४७ सहायक केन्द्राध्यक्ष, ४७५ निरीक्षक, कार्यालय सहयोगी १७६ र यस पल्ट देखि परीक्षा सहयोगी ८३ गरी कुल ८१९ जना रहने छन् भने प्रत्येक केन्द्रमा शान्ति सुरक्षाका लागि १५ जनाका दरले सुरक्षा कर्मी रहने व्यवस्था गरिएको छ ।

त्यस्तै, परीक्षा अनुगमनका लागी प्रत्येक केन्द्र रहेका स्थानीय निकायबाट स्थानीय तहका प्रशासकीय अधिकृत र शिक्षा विकास तर्फका प्रमुखले अनुगमन गर्न पाउने व्यवस्था पनि गरिएको छ । जिल्ला भरीका सम्पूर्ण केन्द्रलाई सिरहा मिर्चैया र लहान गरी तीन भागमा बाँडिएको छ भने परिक्षा अनुगमनका लागि ३ वटा छुटा छुटै अनुगमन टोली रहने व्यवस्था गरिएको छ ।

परीक्षालाई शान्तिपूर्ण र मर्यादित रुपमा सम्पन्न गराउन स्थानीय तहका प्रतिनिधि एवं जनप्रतिनिधि लगायत सबै क्षेत्रलाई आह्वान गरिएको छ ।

परीक्षामा बाधा पुग्ने गरी कुनै किसिमको अमर्यादित कार्य गर्नेलाई १ लाख रुपैयाँ सम्म जरिवाना वा ६ महिना कैद अथजा दुबै सजाय हुने व्यवस्था गरिएको छ ।