कर्जन्हा : गुपचुप रुपमा उपभोक्ता समिति गठन गरेपछि स्थानीयको विरोध

न्यूज ब्यूरो, सिरहा । सिरहाको कर्जन्हा नगरपालिका वडा ३ मा गैरकानुनी तवरले गुपचुप रुपमा उपभोक्ता समिति गठन गरेको भन्दै स्थानीयहरुले विरोध जनाएका छन् ।

वडा ३ मा निर्माण हुन लागेको जितमाहन मन्दिर र जनक चोकदेखि खैराहा टोलसम्मको सडकमा हुने कालोपत्रे निर्माणका लागि गठन गरिएको उपभोक्ता समिति उपर स्थानीयहरुले विरोध जनाएका हुन् ।

विकास निर्माणका लागि उपभोक्ता समिति गठन गरिनुपर्ने सूचना नै प्रकाशित नगरी गुपचुप रुपमै समिति गठन गरेको अगुवा युवा क्षेत्रलाल जित सिँहले बताए । गठित उपभोक्ता समिति विघटनका लागि वडा कार्यालयमा निवेदन दिन जाँदा वडा कार्यालयले निवेदनसमेत लिन नमानेको उनीहरुले जनाए ।

उनीहरुले गैरकानुनी रुपमा गठन गरिएको उपभोक्ता समिति विघटन गरी पुनः नयाँ समिति गठन गरेर सूचनाको हकलाई रक्षा गरिदिन आग्रह गरेका छन् ।

गैरकानुनी रुपमा एकलौटी र गुपचुप तवरले समिति गठन गरी भ्रष्टाचारलाई बढावा दिएको उनीहरुको आरोप छ । उनीहरुले सारा समाजको उपस्थितिमा सर्वसम्मत समिति गठन गर्न माग गरेको छ ।

संसदीय विकास कोषको ५० लाखमा कालोपत्रे र मन्दिर निर्माणका लािग वडा कार्यालयले १० लाख बजेट विनियोजन गरेको छ ।

यता, वडाध्यक्ष कपलेश्वर यादवले यस विषयमा बसेर छलफल गर्ने प्रतिक्रिया दिए ।