सिरहामा विहे भोज तयारी गर्ने क्रममा ग्यास लिक भएर आगलागी, ५० लाख बराबरको क्षति !

न्यूज ब्यूरो, सिरहा । सिरहामा ग्यास लिक भएर आगलागी हुँदा ५० मूल्य बराबरको क्षति भएको छ । सिरहाको लहान नगरपालिका २२ गम्हरिया टोलमा आज (मंगलबार) विहेको खाना तयारी गर्ने क्रममा अचानक ग्यास लिक भएर आगलागी भएको हो ।

स्थानीय राधेश्याम चौधरीकी छोरी सुषमा चौधरीको विहेमा खाना तयारी गर्ने क्रममा भएको आगलागीबाट करिब ५० लाख बराबरको धनमाल जलेर नष्ट भएको ईलाका प्रहरी कार्यालय लहानले जनाएको छ ।

आगोले चौधरीको १ घर, ८ लाख बराबरको जिन्सी सामग्री, नगद २ लाख, सुन डेढ तोला, चाँदी ६० तोला नष्ट भएको छ । ठिठर चौधरीको एउटा घर, २ लाख बराबरको विभिन्न समान र नगद १ लाख ५० हजार जलेर खरानी बनेको छ ।

त्यस्तै, बालकृष्ण चौधरीको १ लाखको सर समान, सुखि चौधरीको जिन्सी ४ लाख, नगद १ लाख ५० हजार, चाँदी ४० तोला, मिठन चौधरीको २० हजारको पराल लगायतका समान जलेको बताइएको छ ।