मिर्चैयामा स्कूल बस र टेम्पो ठोक्किदा १ ठहरै, १ घाईते !

सिरहा, १ माघ । सिरहाको मिर्चैयामा स्कूल बस र टेम्पो एकापसमा ठोक्किदा टेम्पोमा सवार एकजनाको घटनास्थलमै ज्यान गएको छ । पूर्वपश्चिम राजमार्ग अन्र्तगत् मिर्चैया नगरपालिका–५ स्थित आज (बुधवार) विहान भएको सवारी दुर्घटनामा परी मिर्चैया २ बस्ने २७ वर्षीय बिरेन्द्र साहको ज्यान गएको हो ।

दुर्घटनामा परी सोही ठाउँका २५ वर्षका मुकुनदेव साह घाईते भएका छन् । उनको स्थानीय स्तरमा उपचारमा भइरहेको छ । ज्यान गुमाएका बिरेन्द्र र घाईते मुकुनदेव दाईभाई हुन् ।

पूर्वबाट पश्चिमतर्फ जाँदै गरेको टाईम्स स्कूल मिर्चैयाको ना.४ ख. ४९०४ नम्बरको बस र विपरित दिशाबाट आउँदै गरेको ना. ३ स. ३४२० नम्बरको टेम्पु एकापसमा ठोक्किदाँ टेम्पोमा सवार एकजनाको मृत्यू र एकजना घाईते भएको हो ।

ठक्कर दिएर फरार भएका बसलाई खोजविन गरी प्रहरीले नियन्त्रणमा लिएको छ भने टेम्पोसहित टेम्पो चालक र बस चालकलाई समेत नियन्त्रणमा लिइएको छ ।

मृतकको शवको पोष्टमार्टमका लागि लहानस्थित रामकुमार शारडा उमाप्रसाद मुरारका स्मारक अस्पतालमा पठाइएको ईलाका प्रहरी कार्यालय मिर्चैयाका डिएसपी सुकदेव खनालले जनाए ।