जनकपुरमा युवाहरुको बहस भन्छ, -'नेताहरुले युवाहरुलाई युज मात्र गरे '

जनकपुरधाम, १० माघ । जनकपुरमा सुरु भएको युवाहरुको बसहको क्रममा स्थानीय नेताहरुले युवाहरुलाई प्रयोग (युज) मात्र गरेको सहभागीहरुले बताएका छन् ।

शुक्रबारदेखि जनकपुरमा सामाजिक सुरक्षामा युवाको भूमिका, सहभागिता र सशक्तीकरणलगायतका विषयमा जनकपुरका युवाहरुले गरेको बसहको क्रममा नेताहरुले युवाहरलाई प्रयोग मात्र गरेर अवसर भने नदिएको आरोप लगाएका छन् ।

बहस कार्यक्रममा धनुषाका प्रमुख जिल्ला अधिकारी प्रदीपराज कणेलले समाजमा सकारात्मक रूपान्तरणका लागि युवाको भूमिका निकै महत्वपूर्ण रहेको बताए । उनले भने, ’युवाले चाहेमा समाजमा छिटै रूपान्तरण हुनेछ ।

देश बदल्ने युवा शक्तिले नै हो ।’ युवा अभियन्ता दिवाकर उप्रेतीको अध्यक्षतामा भएको कार्यक्रममा कणेलले युवालाई सकारात्मक कार्य गर्न आग्रह गरे । जनकपुरस्थित धनुषा स्काउट भवनमा भएको कार्यक्रममा युवा अगुवाहरूले युवाका समस्याबारे प्रकाश पारे ।

देशमा भएका सबै आन्दोलनको नेतृत्व युवाले नै गरेको भन्दै युवा अगुवा सरोज मिश्रले नेताहरूले युवालाई प्रयोगका पात्रमात्र बनाएको गुनासो गरे । नेताहरूले युवाबाट नानाथरीका काम लिने तर अवसर दिने बेलामा उनीहरूले आफ्ना नातेदार र आसपासेलाई मात्र सम्झने उनको भनाइ थियो ।

अन्तक्रियामा युवा अगुवा सुशील कर्णले मधेश आन्दोलनका बेला युवाले महत्वपूर्ण योगदान दिएको तर अहिलेको सरकारले युवालाई सरकारी आयोगहरूमा अवसर नदिएको आरोप लगाए ।

युथ एड्भोकेसी नेपालको संयोजनमा भएको कार्यक्रममा मानवअधिकार र सामाजिक सुरक्षामा युवाको भूमिका विषयमा युवा अगुवा धीरेन्द्रकुमारले आफ्नो प्रस्तुति दिए ।कार्यक्रमअन्तर्गत विषयगत बहसमा मानवधिकारवादी इन्द्रजीत सहनी, जनकपुर नागरिक समाजका मुरलीमनोहर झा, जनकपुर उपमहानगरपालिका न्यायिक समितिका सचिव अधिवक्ता विजयकुमार सिंह, युवा चन्दन कर्ण आदि सहभागी भए ।

कार्यक्रममा नेपाल स्काउटका चन्दन कौशिक, नेपाल परिवार नियोजन संघका प्रमुख रामबहादुर कार्की, धनुषा स्काउटका रामअवतार साहलगायत उपस्थित थिए ।