थप्पड प्रकरणका सचिव 'झा' लाई मध्यराती फेरी अर्को थप्पड !

जनकपुरधाम, ६ माघ । केही दिन पूर्व प्रदेश नं. २ का आर्थिक मामिला तथा योजना मन्त्री विजय यादवले उद्योग पर्यटन तथा वन मन्त्रालयका सचिव विद्यानाथलाई थप्पड हानेको बहस निकै चल्यो ।

सचिव झाले विभिन्न आरोप लगाउँदै मन्त्री यादवले आफूलाई थप्पड हानेको भन्दै अभद्र तरिकाले गाली गलौजका साथै अभद्र टिकाटिप्पणी समेत गरिएको एक भिडियोमा देख्न सकिन्छ । मन्त्री यादवले सचिव झालाई थप्पड हानेको कुरालाई ठाडो अस्विकार गरेका छन् भने सचिव झाले आफूलाई मन्त्री यादवले थप्पड हानेको दाबी गर्दै आएका छन् ।

थप्पड प्रकरणपछि त्यो दिन नै सचिव झा जनकपुरधामको एक नीजि अस्पतालमा भर्ना भए भने केही घण्टामै डिस्चार्ज भएर घर पनि फर्के । डाक्टरको रिपोर्ट र बयान अनुसार उनलाई हातमा समान्य चोट लागेकोले स्वेलिंग देखिएको थियो । मन्त्री यादवले आफूलाई गालामा थप्पड हानेको भनेपछि सचिवको हातमा स्वेलिंग देखिएपछि शंका उपशंका उब्जिएको थियो ।

त्यो घटना छानबिनको लागि प्रदेश नं. २ कै आन्तरिक मामिला तथा कानुनमन्त्री ज्ञानेन्द्र कुमार यादवको सँयोजकत्वमा छानबिन समिति समेत गठन गरिएको छ भने प्रदेश कार्यालयका कर्मचारीहरु समेत छानबिन र न्यायको माग गर्दै आन्दोलित भएका थिए ।

गत माघ ४ गते उद्योग, पर्यटन, वन तथा वातावरण मन्त्रालयबाट जारी गरिएको विज्ञप्तिमा कर्मचारीहरुलाई नियमित झैँ कामकारवाही निरन्तरता दिन अपिल गरिएको छ भने कर्मचारीहरुको मागप्रति साकारात्मक भएको कुरा एक प्रेस विज्ञप्तिमा उल्लेख गरेपछि कर्मचारीहरु आन्दोलनका कार्यक्रमहरु फिर्ता लिएका छन् ।

कर्मचारीहरुको छाता संगठनको रुपमा रहेको निजामति कर्मचारीहरुको अधिकारीक ट्रेड युनियन जिल्ला कार्य समिति धनुषाले समेत शनिबार एक प्रेस विज्ञप्ति जारी गर्दै उक्त घटनाको लागि निष्पक्ष छानबिन हुने आश्वासनलाई उदृत गर्दै आन्दोलनका कार्यक्रमहरु फिर्ता लिएको जनाइको छ ।

उद्योग, वन, पर्यटन तथा वातारण मन्त्रालयले जारी गरेको आग्रहपूर्ण विज्ञप्तिलाई मध्यनजर गर्दै आन्दोलनका कार्यक्रमहरु फिर्ता लिएका हुन् । न्यायको अपेक्षा सहित पूर्वाग्रह भएर आउने निर्णयलाई नमान्ने जनाउँदै निष्पक्ष छानबिनको प्रतिवेदनलाई आत्मसात गर्ने समेत जनाउँदै आन्दोलनका कार्यक्रम फिर्ता लिएका हुन् ।

यसैबीच, यस घटना प्रकरणका सचिव विद्यानाथ झाले समाजिक सँजाल फेसबुकमा एक स्टेटस लेख्दै आफूलाई मध्यराती पुनः थप्पड हानिएको बताएका छन् । उनले लेखेका छन् :

आज मध्यरातमा फेरी अर्को थप्पड खाइयो। चारैतिर दौडे न्यायको लागि, तर शक्तिको अगाडी निरिह बन्दै गई रहेको छु । मन्त्रीजी मलाई पिटेरै शानसंग हिड्नु भएको छ, आधिकारिक धनुषाको साथिहरु के को लागि आन्दोलन उठान गर्नु भएको थियो र के पाएर सम्झौता गर्नु भो ? मलाई राम्ररी थाहा छ तपाई मध्ये कतिजना म पिटिएकोमा रमाउनु भएको थियो, र त्यसको कारण पनि (अस्ति को सरुवा) । बिज्ञप्तिको भाषा यति कुटिल छ कि तपाईहरु प्रति रहेसहेको सम्मान पनि पखालियो। मेरो र अर्थमन्त्रि बीच को घटना ? २९ गते कै तपाईहरुकै बिज्ञप्तिसंग मेल खादैन। दुइ तिन दिन यसो पेन डाउन गरेर नाटक गर्नु भो र शक्तिका अगाडी घुडा टेक्नु भो। तर भुलेर पनि यो न सोच्नुस कि म हारे, म हार्नु भनेको यो केसमा सत्य र सदाचार हार्नु हो। मलाई क्वाटरमा भेटेर झूटको आश्वाशन खुब दिनु भएको थियो, तर तपाई शक्तिको अगाडी टिक्नु हुन्न भने मलाई उतिबेला पनि राम्ररी थाहा थियो। तपाईहरुको आन्दोलन भन्दा उपलब्धि त मेरो पहिले दिन एक्लैको संघर्षकोले प्राप्त गरि सकेको थिए। मा. मुख्यमन्त्री जीले मसंग " तपाई संग अन्याय भएको छ, माफ गरिदिनुस" भनि सक्नु भएको थियो। तर याद गर्नु होला यो विज्ञप्तिका ड्राफ्ट कर्ता ज्यु, जुन बिऊ आज तपाईहरु असत्यको अगाडी घुडा टेकेर रोप्नु परेको छ, त्यसको फल पनि कालान्तरमा तपाई नै टिप्नु पर्ला। फरेस्टर मर्दा मात्र फुलको माला चढाई दिने NFA, NEFTA संग पनि अपेक्षा रहेन। अध्यक्ष ज्युहरु बडो जोडले भाषण गर्नु हुन्थ्यो, कि राम्रो काम गर्नुस केहि भयो भने हामि लड्छौ। राम बिचारी जी पिटिदा वहा कै गल्ति थियो भनेर पन्छिनु भो। मलाई के भन्नु हुन्छ ? यो लडाई मेरो लागि व्यक्तिगत तवरमा अझै जारि छ, जारि रहन्छ, मैले भनेको थिए अन्तिम सास सम्म लड्छु, कम्जोर छु तर लड्छु, तपाई हरुले जस्तो घुडा टेक्दिन ! तपाईहरु बाहेक, मलाई चिन्ने र नचिन्ने सोसल मिडिया र पत्रपत्रिका र रजिस्टरमा सिग्नेचर गरेर केन्द्रिय गृह मन्त्रालयमा बुझाउनु हुने सम्पूर्ण सकल दर्जाका स्वतन्त्र कर्मचारी साथिहरु प्रति आभार व्यक्त गर्दछु, नतमस्तक छु |

घटनाको छानबिन कार्य जारी रहेको छ ।