गाउँपालिका उपर ५ लाखको उधारो तेल, भुक्तानी माग्दा भन्छ, 'अफिसको ईंट लैजाउ'

जनकपुरधाम, ७ पुस । धनुषाको एक गाउँपालिकाले लाखौँको ईन्धन उधार लिएरपनि हालसम्म भुक्तानी दिएको छैनन् ।

धनुषा जिल्लाको मुखियापट्टि मुसहरनिया गाउँपालिकाले लामो समयदेखि तेलको बक्यौता राखेर गाडी चढ्दै आएको पाईएको छ । जनकपुरधाम उपमहानगरपालिका २० का बाबा पेट्रोल पम्पलाई गत साउनदेखिको झण्डै पाँच लाख रुपैंया बक्यौता राखेर गाउँपालिकाका पदाधिकारीले गाडी चढ्दै आएका हन् ।

पम्पका सँचालक विवेक कुमार साहले गाउँपालिकालाई पटक–पटक ताकेदा गर्दा पनि पेट्रोल डिजेलको पैसा नतिरेको गुनासो गरेका छन् । उनले पत्रकार सम्मेलनको आयोजना गरि गाउँपालिकाको बदमासीबारे मुख खोलेका हुन् । पैसाको ताकेता गर्दा गाउँपालिकका अध्यक्ष मनोज यादवले आनाकानी गर्दै उनले गुनासो पोखे ।

उनले भने, ‘पटक–पटक पैसा तिर्न हारगुहार गर्दा लेखापाल राम नरेश साहले आनाकानी गरे । गाउँपालिका कार्यालय पुगेर प्रमुख यादबसँग भुत्तानी माग्दा तत्कालिन अधिकृतसँग माग्नुस्, म पेट्रोल लिएकै छैन भनेर उल्टै हप्काएर पठाउनुभयो ।’ प्रोपराइटर साहले प्रमुख यादबलाई पछि फोन गर्दा कार्यालयको इँटा लैजाउ भनेर उल्टै धम्क्याएको रेकोर्ड पनि सुनाए ।

उनका अनुसार गाउँपालिकाकै लेटर प्याडमा पुस १ गतेसम्म गाउँपालिकाका पदाधिकारीले पेट्रोल र डिजेल लगेका छन् । गाउँपालिकासँग विगत एक वर्षदेखि नियमित कारोबार हुँदै आए । ६ महिनासम्म नियमित भुक्तानी गरेपनि गत साउनदेखि पुस १ गतेसम्मको पैसा गाउँपालिकाले रोकेको छ । सम्झौता गर्दा गाउँपालिकाका तत्कालीन प्रमुख प्रशासकीय अधिकृत हरि शंकर यादवले आफ्नो सरुवा भईसकेकाले केही गर्न नसक्ने जफाव फर्काउँदै आएको साह बताउँछन् ।

साहले भने, ‘मैले गाउँपालिकामै पुगेर पटक–पटक पैसा तिर्न सम्झाए । तर तिर्ने बहानाबाजी मात्रै हुन्छ । अब कानुनी बाटो अपनाउँछु ।’ साहले सम्झौताको कागजपत्र आफुसँग भएको बताउँदै गाउँपालिका विरुद्ध प्रशासनमा ठगी मुद्दा दर्ता गर्ने तयारी गरेको सुनाए ।

उनले पैसा नतिरेका कारण पुस २ गतेबाट इन्धन दिन रोकेको पनि बताए । यता, गाउँपालिका प्रमुख यादबसँग सम्पर्क गर्दा हुन सकेन । लेखापाल साहले गाउँसभा हुन नसकेका कारण रकम भुक्तानी दिन नसकेको बताए । उनले भने, ‘गाउँपालिका प्रमुखले के भन्यो मलाई थाहा भएन । तर प्रमुख प्रशासकीय अधिकृतले रकम भुक्तानी गर्ने भनेर भन्नुभएको छ ।