Ncell टावरको १७ वटा ब्याट्री चोरी गरी भाग्दै गर्दा ४ जना पक्राउ

न्यूज ब्यूरो, जनकपुरधाम । मोबाईल कम्पनी एनसेलको टावरमा प्रयोग गरिएको १७ वटा फास्ट चार्जिङग व्याट्री सहित प्रहरीले ४ जनालाई पक्राउ गरेको छ ।

धनुषा जिल्लाको बटेश्वर गाउँपालिका वडा नं. १ जनमुक्ति चोकभन्दा करिब आधा किलोमिटरको दुरी पूर्वको खेतमा स्थापित गरिएको एनसेलको टावर प्रसारणको लागि प्रयोग गरिएको १७ वटा ब्याट्री सहित ४ जनालाई मँगलबार पक्राउ गर्दै बुधबार सार्वजनिक समेत गरिएको छ ।

जिल्ला प्रहरी कार्यालय धनुषाले पत्रकार सम्मेलन गरी ब्याट्री चोरी गरी भाग्दै गरेको अवस्थामा महोत्तरीको सितापुर ८ सिरहा बस्ने विद्यानन्द यादव, सिरहा अर्जनाहा रोहितकुमार यादव, सप्तरी सुरंगाका कुदोस गिरी र लक्ष्मीपुर कटारी ३ बस्ने सम्पैतकुमार यादवलाई प्रहरीले पक्राउ गरी सार्वजनिक गरेको हो ।

बटेश्वर बजारस्थित अस्थायी प्रहरी चौकीको गस्ती टोलीले राति गाडी जाँचका उनीहरुलाई पक्राउ गरेको प्रहरीले जनाएको छ । गएराती करिब १ः१५ बजेको समयमा एनसेलको टावरको ब्याट्री चोरी गर्दै BR 15 PA 3454 नम्बरको भारतीय स्कारपिओ गाडीमा राखेर उनी भाग्दै थिए । प्रहरीलाई शंका लागेर चेकजाँच गर्दा चोरी को ब्याट्री सहित बिगी खोलामै चारैजनालाई पक्राउ गरी नियन्त्रणमा लिएको जनाइएको छ ।