सिरहामा एक विरामीलाई सम्मान मधेशको सहयोग

न्यूज ब्यूरो, सिरहा । सम्मान मधेश संस्थाले सिरहामा एकजना विरामीलाई आर्थिक सहयोग गरेको छ । साउदी स्थित रहेको नेपालीहरुको साझा संगठन सम्मान मधेशद्धारा सिरहाको लहान नपा–२४ मलहन्माका हिरालाल महतोलाई आर्थिक सहयोग गरिएको हो ।

लहान नपा–२४ मलहन्मा निवासी हिरालाल महतोलाई सम्मान मधेशका पदाधिकारीहरुले उनको घरमै पुगी २५ हजार रुपैया हस्तान्तरण गरेका हुन् । आर्थिक अवस्था निकै दयनिय रहेको महतोलाई उपचारका लागि आर्थिक सहयोग गरिएको हो ।

महतो टिवी र दमाका विरामी छन् । उनका २ छोरा र १ छोरी छिन् । आर्थिक सहयोग सम्मान मधेशका शम्भु चौधरी र दिपेन्द्र साहले हस्तान्तरण गरेका थिए ।

सम्मान मधेश नेपाली गरिव, विपन्न तथा अनाथ घरपरिवारहरुलाई विभिन्न समयमा सहयोग गर्दै आएका छन् । यसको केन्द्रिय कार्यालय जनकपुरधाममा रहेको छ ।