जरुवा खोलामा पक्की पुल, राजमार्गदेखि कमलदहसम्म कालोपत्रे

न्यूज ब्यूरो, सिरहा । सिरहाको मिर्चैया नगरपालिका ९ रमपुरास्थित जरुवा खोलामा पक्की पुल निर्माण हुने भएको छ । खोलामा पुल नहुँदा सधैं सास्ती खेप्नुपर्ने समस्यालाई दृष्टिगत गर्दै पक्की पुल बनाउन लागिएको हो ।

यससँगै रमपुरा तथा त्यस क्षेत्रका बासिन्दामा नयाँ खुशी थपिएको छ । मिर्चैया ९ को वडा कार्यालय रमपुरामा दिपावली तथा छठको अवसरमा बुधबार आयोजित शुभकामना आदानप्रदान कार्यक्रममा राष्ट्रिय जनता पार्टी नेपालका अध्यक्ष मण्डलका सदस्य तथा सिरहा निर्वाचन क्षेत्र नं. ४ का प्रतिनिधिसभा सांसद राजकिशोर यादवले चाँडै पुल निर्माण हुने प्रतिबद्धता जनाउनुभयो ।

उहाँले विभिन्न निकायको सहयोगमा निर्माण हुने उक्त पुलको छठलगत्तै शिलान्यास हुने बताउनुभएको छ । खोलामा पुल नहुँदा त्यस क्षेत्रका सर्वसाधारण विगत लामो समयदेखि ठूलो समस्या झेल्दै आएका छन् ।

त्यसैगरी, मिर्चैया ९ मै अवस्थित ऐतिहासिक तथा पौराणिक पर्यटकीय धार्मिक स्थल कमलदहसम्मको सडकमा समेत कालोपत्रे हुने भएको छ । पूर्वपश्चिम राजमार्ग अन्तर्गत् घुर्मी बजारदेखि कमलदहसम्मको सडकमा छठ लगत्तै कालोपत्रे निर्माणको काम सुरु हुने सांसद यादवले बताउनुभएको हो ।

यस्तै, सोही वडा अन्तर्गत ढोढना चौधरी टोलमा आफ्नो संसदीय विकास कोषको लगानीमा सामुदायिक भवन र घुर्मी बजारमा सार्वजनिक मोटर जडानको लागि उद्घोष गर्नुभएको छ ।

कार्यक्रमलाई सम्बोधन गर्दै सांसद यादवले मुलुकको विकास र समृद्धिको निम्ति पार्टीबाट माथि उठेर लागे मात्र सम्भव रहेको जिकिर गर्नुभयो । उहाँले पार्टी र गुट नहेरी सबैलाई हातेमालो गरेर एकतावद्ध रुपमा विकास निर्माण तथा समाज विकासका लागि अघि बढ्न आग्रह समेत गर्नुभयो ।