'बेटी बचाउ, बेटी पढाउ' अभियानमा कान्छो मेयर, नगरका हरुवा चरुवालाई शैक्षिक समाग्री

न्यूज ब्यूरो |
धनुषा, ९ भदौ । धनुषाको शहिदनगरका अति विपन्न परिवारका बालबालिकाहरुलाई शैक्षिक समाग्री वितरण गरिएको छ ।

शहिदनगर नगरपालिकाका मेयर उदय कुमार बरबरियाले नगर भित्रका अति विपन्न (हरुवा चरुवा) समुदायका बालबालिकाहरुलाई विद्यालय सम्म पहुँच बनाउने उदेश्यका साथ उनीहरुलाई शैक्षिक समाग्री वितरण गरिएको हो ।

शनिबार एक कार्यक्रमबीच नगरभित्रका उक्त समुदायका बालबालिकाहरुलाई स्कूल ब्याग, पेन्सिल, स्टेशनरी, ईरेजर लगायतका समाग्री वितरण गरिएको जनाइएको छ । नगर सबै बालबालिकाहरुलाई विद्यालयसम्म पहुँच बनाउनको लागि कान्छो मेयर बरबरियाले सिआईसी धनुषाको सहयोगमा उक्त समाग्री वितरण गरिएको हो ।

प्रदेश नं. २ मा मुख्यमन्त्रीको 'बेटी बचाउ बेटी पढाउ' अभियानलाई आत्मसात गर्दै विद्यालय बाहिर रहेका बालिकाहरुलाई बढी लक्षित गर्दै शैक्षिक समाग्री वितरण गर्दे विद्यालयसम्म आउन आग्रह समेत गरे ।

नगरको हठ्ठिपुर र पचेर्वा लगाएर जम्मा ३ सय ५० जना बालबालिकाहरुलाई उक्त समाग्री प्रदान गरिएको मेयर बरबरियाले न्यूज ब्यूरोसँग भने । मेयर बरबरियाको यस्तो कार्यलाई स्थानीयहरुले स्वागत र सराहनीय पहलकदमी बताएका छन् ।