घाँस काट्न गएकी महिलामाथि दिनदहाडै धारिलो हतियार प्रहार, सुनचाँदीका गरगहना लुटियो

न्यूज ब्यूरो, सिरहा । सिरहाको कल्याणपुर नगरपालिका वडा नं. ४ मझौलियामा घाँस काट्न गएकी एक महिलामाथि अज्ञात व्यक्तिले धारिलो हतियार प्रहार गरी सुनचाँदीका गरगहना लुटेको घटना सार्वजनिक भएको छ।

स्थानीयका अनुसार मझौलिया निवासी दिनेश यादवकी श्रीमती चन्द्रकला देवी यादव शुक्रबार निर्दना–डरौलस्थित आफ्नै खेतमा घाँस काट्न गएकी थिइन्। सोही क्रममा अज्ञात व्यक्तिले पछाडिबाट आएर उनको मुख थुनी घाँटीमा धारिलो हतियार प्रहार गरेको बताइएको छ।

घटनामा गम्भीर घाइते भएकी चन्द्रकलाबाट करिब ४० तोला चाँदीका कडा, ४ आनाको मंगलसूत्र, ८ आनाको सुनको कानको गहना तथा १ आनाको नाकको गहना लुटिएको परिवारजनले बताएका छन्।

घाइते चन्द्रकलाको सिरहाको मिर्चैयास्थित एक अस्पतालमा उपचार भइरहेको छ। उनको अवस्था उपचारपछि मात्रै स्पष्ट हुने चिकित्सकहरूले बताएका छन्।

घटनापछि स्थानीयवासी त्रसित बनेका छन्। घटनामा संलग्न व्यक्तिको खोजी तथा अनुसन्धान कार्य भइरहेको प्रहरीले जनाएको छ। प्रहरीले घटनास्थलको निरीक्षण गरी आवश्यक अनुसन्धान अगाडि बढाएको छ।

दिनदहाडै खेतमा काम गरिरहेकी महिलामाथि भएको आक्रमण र लुटपाटको घटनाले स्थानीय क्षेत्रमा सुरक्षा व्यवस्थाप्रति समेत प्रश्न उठाएको छ। प्रहरीले दोषीलाई चाँडै पक्राउ गरी कानुनी कारबाही गरिने जनाएको छ।