गुरुँगको मलद्धारबाट प्रहरीले निकाले ब्राउन सुगर, दुई जना पक्राउ

न्यूज ब्यूरो, विराटनगर । उर्लाबारी–उर्लाबारी नगरपालिका वडा नं. ७ स्थित गोलचोकबाट लागूऔषध (ब्राउन सुगर जस्तो देखिने खैरो लिसाइलो पदार्थ) सहित दुई जनालाई प्रहरीले नियन्त्रणमा लिएको छ।

इलाका प्रहरी कार्यालय उर्लाबारीबाट खटिएको टोलीले प्र–१–०२०५० प १९६० नम्बरको मोटरसाइकल चेकजाँच गर्ने क्रममा चालक र पछाडि सवार दुवैलाई लागूऔषधसहित पक्राउ गरेको हो।

पक्राउ पर्नेमा उर्लाबारी–६ बस्ने २९ वर्षीय केशव श्रेष्ठ र उर्लाबारी–५ बस्ने २४ वर्षीय निश्चल गुरुङ रहेका छन्।

प्रहरीका अनुसार चेकजाँचका क्रममा केशव श्रेष्ठको मलद्वारबाट प्लास्टिकसहित १८ ग्राम ९२० मिलिग्राम र प्लास्टिकबाहेक १४ ग्राम ७२० मिलिग्राम लागूऔषध फेला परेको थियो।

त्यस्तै, निश्चल गुरुङको मलद्वारबाट पनि प्लास्टिकसहित ११ ग्राम र प्लास्टिकबाहेक ९ ग्राम ४०० मिलिग्राम लागूऔषध बरामद गरिएको प्रहरीले जनाएको छ।

दुवै जनालाई लागूऔषधसहित नियन्त्रणमा लिएर थप अनुसन्धान अघि बढाइएको इलाका प्रहरी कार्यालय उर्लाबारीले जनाएको छ।