बसमा झुण्डिएको अवस्थामा कन्डक्टर मृत फेलाः हत्या गरिएको बुवाको आरोप, प्रहरी भन्छन्-'आत्महत्या देखियो'

न्यूज ब्यूरो, जनकपुरधाम । गत बैशाख ८ गते धनुषाको कमला नगरपालकिा वडा नं. ६ सखुवा मडानस्थित एक सार्वजनिक बसमा झुण्डिएको अवस्थामा मृत फेला परेका सोही स्थानका कुन्दन कुमार पासवानको घटनामा बुवा छेदी पासवानले हत्या गरेको भन्दै भौतारिरहेका छन् ।

गत बैशाख ८ गते नै भएको घटनालाई लिएर उनले आफ्नो छोराको हत्या गरेको आशंका गर्दै प्रहरीमा मुद्दा दर्ताको लागि गुहार्दा पनि मुद्दा दर्ता नगरिदिएको आरोप लगाएका छन् । उनले प्रहरी घटनास्थलमा पुगेर पोष्टमार्टम गराएको बताए । प्रहरीले पोष्टमार्टमको रिपोर्ट अनुसार, कुन्दनले आत्महत्या गरेको देखिएको ईलाका प्रहरी कार्यालय खजुरीले जनाएको छ ।

प्रहरीले भन्यो–“घटनाको प्रकृति हेर्दा पनि आत्महत्या देखिएको छ । पोष्टमार्टम रिपोर्टमा पनि आत्महत्या देखिएको छ । यसमा शंकाको आधारमा हत्या भनेर हुँदैन ।” सखुवा मडानस्थित रोकि राखेको बसमा रातीमै झुण्डिएको बताइएको छ । बिहान मात्र देखेपछि प्रहरीलाई खवर गरिएको थियो ।

मृतक कुन्दनका बुवा छेदी पासवानले भने आफ्नो छोरालाई सोही स्थान बस्ने केही व्यक्तिहरुले धाकधम्की दिएकोमा चारदिनपछि घटना भएको भन्दै हत्या भएको हुन सक्ने शंका जाहेर गरेका छन् ।

मडानबाट जनकपुरसम्म चल्ने मधेश प्रदेश ०३–००१ ख ७५५१ नम्बरको बसमा उनी बैशाख ८ गते बिहान झुण्डिएको अवस्थामा फेला परेका थिए । लागुऔषध सेवनकर्ता रहेका कुन्दन आत्महत्या गरेको बताउँदै प्रहरीले जबरदस्ती कसैलाई फँसाउन हत्याको मुद्दा दर्ता गर्न नमिल्ने बताए । प्रहरीले आधार, प्रमाणको आधारमा मात्रै मुद्दा दर्ता हुने बताएको छ ।

स्थानीय राकेश पासवानले धाकधम्की दिएको छेदीले बताए । बाटोको विवाद भएको कारण राकेशले धाकधम्की दिएको बताईएको छ । उनीहरुको साथै सुरज पासवान, राहुल पासवानमाथि उनले शंका गदैै मुद्दा दर्ता गराउन दिनहुँ प्रहरीमा धाईरहेका छन् । यद्यपी, प्रहरीले भिसेराको रिपोर्ट समेत आएपछि थप प्रष्ट हुने जनाएको छ ।