धनुषाको जनकनन्दिनीमा नयाँ बर्षको पूर्वसँध्यामा मात्र फूल्ने अनौठो फूल, केही घण्टामै हुन्छ गायब

न्यूज ब्यूरो, जनकपुरधाम । प्रत्येक हिन्दु नयाँ बर्षको दिन सिरहाको सल्हेश फूलबारीमा फूल्ने सुनाखरी फूलको बारेमा तपाईले सुन्नुभएको होला, तर धनुषाको जनकनन्दिनी गाउँपालिका वडा नं. ३ स्थित हनुमान मन्दिरको पिपल बृक्षमा पनि अनौठो फूल फूल्छन् ।

प्रत्येक नयाँ बर्षको पूर्वसँध्या अर्थात चैत्तको अन्तिम तिथिमै मात्र फूल्ने यो फूल हेर्न साँझदेखि सर्वसाधारणको भीड जम्मा हुन थालेको छ । अनौठो प्रकारको फूल्ने यो फूललाई धार्मिक दृष्टिकोणले हेर्न थालिएको छ ।

जनकनन्दिनी ३ महुवा टोलस्थित रहेको हनुमान मन्दिर प्राँगनको विशाल पिपलको वृक्षमा यो फूल विगत केही बर्षदेखि मात्र फुल्न सुरु भएको स्थानीयहरु बताउँछन् । प्रत्येक बर्षको अन्तिम दिन फूल्ने र नयाँ बर्षको १ गते राती फूल्ने यो फूल अनौठो देखिन्छन् ।

चैत्त ३० गते सोमबार समेत यो फूल फूलेपछि स्थानीयहरुको भीड बढयो । यो फूल फूल्न थालेपछि सो स्थानलाई धार्मिक रुपमा विकास गर्न माग स्थानीयहरुले स्थानीय सरकारसँग गरेका छन् ।

वैज्ञानिक भाषामा यसलाई क्वीन अफ नाईट क्याक्टस (रातकी रानी) पनि भन्ने गरिन्छ । रातमै मात्र फूल्ने नाईट ब्लुमिँग सिरस भन्ने गरिन्छ, तर यहाँको लागि नयाँ भएकोले यसलाई अनौठो रुपमा लिइएको छ ।