सहिद अजवलाल यादवको स्मृतिसभामा नेताहरूले गरे योगदानको उच्च मूल्याङ्कन

न्यूज ब्यूरो, जनकपुरधाम । महान सहिद अजवलाल यादवको २५औं स्मृति सभा नेपाल कम्युनिस्ट पार्टी (नेकपा) धनुषाधाम नगरपालिका नगरकमिटीको आयोजनामा सम्पन्न भएको छ।

कार्यक्रममा राजनीतिक दलका नेता, जनप्रतिनिधि तथा कार्यकर्ताहरूको उल्लेखनीय उपस्थिति रहेको थियो। कार्यक्रममा प्रमुख अतिथिका रूपमा प्रतिनिधि सभा सदस्य मातृकाप्रसाद यादव सहभागी भएका थिए भने विशिष्ट अतिथिमा प्रतिनिधि सभा सदस्य श्रावण बरबरिया यादव रहेका थिए।

त्यसैगरी नेकपाका केन्द्रीय सदस्य सुधिर साह, सहिद अजवलाल यादवकी धर्मपत्नी तथा नेकपा माओवादी केन्द्रकी केन्द्रीय सदस्य शिला यादव, दीपक यादव, सबैला नगरपालिकाका मेयर कारीराम यादव, उपमेयर रहिमा खातुन, मिथिला बिहारी नगरपालिका वडा नं. ७ का वडा अध्यक्ष संजय शर्मा तथा धनुषाधाम नगरपालिका वडा नं. ४ का वडा अध्यक्ष मनोज यादव लगायतका नेताहरूको उपस्थिति रहेको थियो।

सहिद अजवलाल यादव २०५८ साल चैत ९ गते तत्कालीन जनयुद्धका क्रममा सहादत प्राप्त गरेका थिए। कार्यक्रममा सहभागी वक्ताहरूले उनको योगदानलाई नेपाली इतिहासको महत्वपूर्ण अध्यायका रूपमा स्मरण गरे।

कार्यक्रममा बोल्दै विशिष्ट अतिथि श्रावण बरबरिया यादवले सहिदहरूको बलिदानकै कारण मुलुकमा राजनीतिक परिवर्तन सम्भव भएको उल्लेख गर्दै वर्तमान पुस्ताले त्यसको रक्षा र सुदृढीकरण गर्नुपर्नेमा जोड दिए। उनले सहिदको सपना अनुसार समतामूलक समाज निर्माण गर्न सबै राजनीतिक दल र नागरिक एकजुट हुनुपर्ने धारणा राखे।

त्यसैगरी प्रमुख अतिथि मातृकाप्रसाद यादवले सहिद अजवलाल यादवको योगदानलाई स्मरण गर्दै लोकतन्त्र, संघीयता र सामाजिक न्याय स्थापनाका लागि उनले दिएको बलिदानलाई कहिल्यै बिर्सन नहुने बताए। उनले सहिद परिवारको सम्मान, संरक्षण र उनीहरूको योगदानको कदर गर्नु राज्यको प्रमुख दायित्व भएको पनि उल्लेख गरे।

कार्यक्रमको अध्यक्षता नगरकमिटी अध्यक्ष बिशनी यादवले गरेका थिए। अध्यक्ष यादवले सहिदको बलिदानबाट प्रेरणा लिएर समाज रूपान्तरणका अभियानलाई अझ सशक्त बनाउनुपर्ने आवश्यकता औंल्याए।

स्मृति सभामा सहभागीहरूले सहिद अजवलाल यादवप्रति श्रद्धाञ्जली अर्पण गर्दै उनको अधुरो सपना पूरा गर्न प्रतिबद्धता व्यक्त गरेका थिए।