बालेन रवि मिलेपछि देशमा राजनीतिक तरँग, घण्टीबाट चुनाव, बालेन प्रधानमन्त्रीका उम्मेदवार

न्यूज ब्यूरो, काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौं महानगरपालिकाका प्रमुख बालेन्द्र शाह (बालेन)बीच एउटै राजनीतिक दलमार्फत निर्वाचनमा सहभागी हुने विषयमा सातबुँदे सहमति भएको छ।

सहमतिअनुसार रास्वपाको नेतृत्वमा रवि लामिछाने रहने र आगामी प्रतिनिधि सभा निर्वाचनपछि संसदीय दलको नेता तथा भावी प्रधानमन्त्रीको उम्मेदवारका रूपमा बालेन्द्र शाह रहने व्यवस्था गरिएको छ। सहमतिपत्रको बुँदा नम्बर ४ मा “राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने” उल्लेख गरिएको छ।

दुवै नेताले हस्ताक्षर गरेको सहमतिपत्रमा नेपालको समतामूलक र उन्नत भविष्यप्रति प्रतिबद्धता व्यक्त गर्दै सामाजिक न्यायसहितको उदार अर्थतन्त्रमा विश्वास गर्ने तथा बहुलवादी लोकतान्त्रिक प्रणालीभित्र सुशासन कायम गर्ने साझा दृष्टिकोण प्रस्तुत गरिएको छ। साथै, आम नागरिकका आकांक्षा सम्बोधन गर्न सबै सुसंस्कृत र परिवर्तनकामी राजनीतिक शक्तिहरूबीच सहकार्य अपरिहार्य रहेको तथ्यलाई आत्मसात गर्दै एकताका लागि सहमति भएको जनाइएको छ।

सहमतिपत्रको पहिलो बुँदामा जेन–जी आन्दोलनप्रति अपनत्व जनाउँदै उनीहरूका माग र अपेक्षा सम्बोधन गर्न दुवै पक्ष प्रतिबद्ध रहने उल्लेख गरिएको छ।