रहेनन् बलिउडका दिग्गज अभिनेता असरानी

न्यूज ब्यूरो, जनकपुरधाम । बलिउडका प्रसिद्ध हास्य र चरित्र अभिनेता गोवर्धन असरानी (असरानी) को ८४ वर्षको उमेरमा निधन भएको छ। उनी विगत केही समयदेखि स्वास्थ्य समस्याबाट ग्रस्त थिए र मुम्बईको आरोग्य निधि अस्पताल, झुहुँ (जुहू) मा उपचाररत अवस्थामा आइतबार राति अन्तिम सास लिएका हुन्।

पारिवारिक स्रोतका अनुसार असरानीलाई पछिल्ला दिनहरूमा सास फेर्न कठिनाइ र फोक्सोमा पानी जम्ने समस्या देखा परेको थियो। अवस्था जटिल भएपछि उनलाई अस्पताल भर्ना गरिएको थियो, तर चिकित्सकहरूको प्रयास असफल रह्यो। उनको अन्त्येष्टि मुम्बईकै सान्ताक्रुज शवदाह गृहमा सोमबार बिहान पारिवारिक उपस्थितिमा सम्पन्न गरिएको भारतीय मिडियाले जनाएको छ।

निधनभन्दा केही घण्टा अघिमात्र उनले सामाजिक सञ्जालमार्फत दिवालीको शुभकामना सन्देश सार्वजनिक गरेका थिए। त्यसैले उनका प्रशंसक र सहकर्मीहरू उनका अकस्मात् निधनको समाचारले स्तब्ध बनेका छन्।

१९४१ जनवरी १ मा राजस्थानको जयपुरमा जन्मिएका असरानीले सन् १९६० को दशकको अन्त्यतिर बलिउडमा प्रवेश गरेका थिए। उनले ३५० भन्दा बढी हिन्दी चलचित्रहरूमा अभिनय गरेका छन्। उनका उत्कृष्ट हास्य अभिनयहरूले हिन्दी सिनेमामा अमिट छाप छोडेका छन्।

सन् १९७५ को चर्चित चलचित्र ‘शोले’ मा उनले निर्वाह गरेको “अंग्रेजों के ज़माने के जेलर” पात्रले उनलाई सधैंका लागि अमर बनायो। सो डायलग र उनको शैली अहिले पनि दर्शकको मनमा गढेको छ।

असरानीले छोटी सी बात, अमर अकबर एन्टोनी, चुपके चुपके, हेरा फेरी, भूल भुलैया लगायतका सफल चलचित्रहरूमा यादगार भूमिका निभाएका थिए। उनी हास्य र चरित्र दुवै भूमिकामा समान रूपले सक्षम थिए।

उनको निधनपछि भारतीय फिल्म जगत शोकमग्न बनेको छ। प्रधानमन्त्री नरेन्द्र मोदीसहित थुप्रै बलिउड कलाकारहरूले सामाजिक सञ्जालमार्फत श्रद्धाञ्जलि अर्पण गर्दै भनेका छन् — “असरानीले भारतीय सिनेमामा हाँसोको माध्यमबाट सधैं मानवीयता र सरलता फैलाएका थिए।”

असरानी पछाडि उनकी श्रीमती मञ्जु असरानीलगायत परिवारका सदस्य रहेका छन्। उनको निधनले बलिउडको हास्य अभिनय क्षेत्रले एक युगान्तकारी कलाकार गुमाएको छ।