कर्जन्हाबासीले तताए सडक, कर्मचारी कुट्ने मेयरमाथि कारवाहीको माग

न्यूज ब्यूरो |

सिरहा, ६ साउन । सिरहाको कर्जन्हा नगरपालिकाका नागरिक समाजले मेयरको विरुद्धमा सडक तताएका छन् । कर्जन्हा नगरपालिकाका नगर प्रमुख गंगा पासवानले आफ्नै कार्यालयका कर्मचारी उपर हातपात गरेको भन्दै स्थानीयवासिन्दाले आइतबार बिहान पूर्वपश्चिम राजमार्गस्थित कर्जन्हाको वडा ११ बस्तीपुरमा करिब १ घण्टा चक्काजाम गरेका हुन् ।

नगरपालिकाले खरिद गरेको माटो खन्ने जेसीबी गाडीको भ्याट बिलबिना नै भुक्तानीको लागि कागजपत्र तयार पार्न दबाब दिएको र नमान्दा नगरपालिकाका जिन्सी शाखा तथा प्रशासन शाखा प्रमुख बलिराम यादवमाथि कुटपिट तथा दुव्र्यवहार गरेको भन्दै स्थानीहरु बिरोधमा उत्रिएका छन् ।

स्थानीय नागरिक समाजले गरेको चक्काजाममा गन्तव्यका लागि छुटेका सवारी साधन राजमार्गमै रोकिएका थिए । चक्काजामबाट राजमार्ग अवरुद्ध भएपछि ईलाका प्रहरी कार्यालय मिर्चैया र कर्जन्हाबाट खटिएका संयुक्त प्रहरी टोलीले हस्तक्षेप गरी बाटो खोलाएको थिए ।