ब्राउन सुगर, नगद र सुनसहित दुई लागुऔषध कारोबारी पक्राउ

न्यूज ब्यूरो, सिरहा । जिल्ला प्रहरी कार्यालय सिरहा र इलाका प्रहरी कार्यालय लहानको संयुक्त विशेष टोलीले लागुऔषध ब्राउन सुगरसहित दुई जनालाई पक्राउ गरेको छ। प्राप्त गोप्य सूचनाका आधारमा असार १९ गते दिउँसो ४:१५ बजे लहान नगरपालिका–११ स्थित पडरिया टोलमा रहेका मिथलेश कुमार चौधरीको घरमा खानतलासी गर्दा लागुऔषध र नगदसहित दुई जनालाई पक्राउ गरिएको हो।

पक्राउ पर्नेमा घरधनी २८ वर्षीय मिथलेश चौधरी र सोही ठाउँका २४ वर्षीय राजनन्दन चौधरी रहेका छन्। प्रहरीले मिथलेश चौधरीको साथबाट प्लाष्टिकसहित ११३.९१ ग्राम ब्राउन सुगर (प्लाष्टिक बाहेक १०९ ग्राम), नगद रु. ७,३१०, एक थान मोबाइल, घरको दराजबाट रु. २,७५,३०० नेपाली रुपैयाँ, रु. १,२५० भारतीय रुपैयाँ, सुन जस्तो देखिने एक थान तिलहरी र एक थान नेकलेस, डिजिटल तराजु र कैंची समेत बरामद गरेको छ।

त्यसैगरी, राजनन्दन चौधरीको साथबाट प्लाष्टिकसहित १०.७१ ग्राम ब्राउन सुगर (प्लाष्टिक बाहेक ९.६१ ग्राम), नगद रु. २,१०० र एक थान मोबाइल फेला परेको प्रहरीले जनाएको छ।

पक्राउ परेका दुवै जनालाई लागुऔषध मुद्दामा अनुसन्धानका लागि असार २० गते जिल्ला अदालत सिरहामा पेश गरी पाँच दिनको म्याद लिइएको छ।
प्रहरीका अनुसार घटनास्थलबाट कुल १२४.६२ ग्राम लागुऔषध (प्लाष्टिकसहित) तथा प्लाष्टिक बाहेक ११८.६१ ग्राम ब्राउन सुगर र नगद रु. २,८६,७१० बरामद गरिएको छ।

प्रहरीले घटनासम्बन्धी थप अनुसन्धान अघि बढाएको जानकारी दिएको छ।